मुंबई : गेल्या काही वर्षांत शहर आणि उपनगरांत उंच इमारती, झोपडपट्टी, कार्यालये, हॉटेल्स, दुकाने आदींमधील अग्निसुरक्षेच्या नियमांकडे मोठ्या प्रमाणावर दुर्लक्ष होत आहे. त्यामुळे गेल्या तीन वर्षांत १३ हजार २०३ आग लागण्याच्या घटना घडल्या आहेत. यंदा जानेवारीपासून आत्तापर्यंत ४,७२१ आगीच्या घटनांची नोंद झाली असून मागील वर्षाच्या तुलनेत हे प्रमाण सात टक्के अधिक आहे. यंदा ३३ मुंबईकरांचा भाजून मृत्यू झाला असून २९० जण जखमी झाल्याची माहिती अग्निशमन दलातील सूत्रांनी दिली. गेल्या वर्षीच्या तुलनेत यंदा आगीत मृत्युमुखी पडलेल्यांची संख्या जवळपास अडीच पट अधिक आहे. यंदा दिवाळीत म्हणजेच नोव्हेंबरमध्ये मुंबईत सर्वाधिक ६५५ आगीच्या घटना घडल्या आहेत. मुंबईत ८० टक्के आगीच्या घटना शॉर्टसर्किटमुळे होतात. भविष्यात आगीच्या घटना टाळण्यासाठी फायर ऑडिट व अग्निशमन यंत्रणा असणे आवश्यक आहे. तसेच उंच इमारतींमध्ये आगीच्या घटना रोखण्यासाठी इव्हॅक्युएशन लिफ्ट मार्गदर्शक तत्त्वे आवश्यक आहेत. जानेवारीमध्ये दादरमधील ४४ मजली इमारतीला भीषण आग लागली होती. ही आग इतकी वाढली होती की, ती आटोक्यात आणण्यासाठी पाच तास लागले. इमारतीमध्ये आग विझवण्यासाठी लिफ्ट असती तर मदत व बचावकार्य करण्यात फारशी अडचण आली नसती, असे अग्निशमन दलाचे अधिकारी सांगतात.
गोरेगावमधील एसआरए बिल्डिंगमध्ये आग लागल्यानंतर मुख्यमंत्री एकनाथ शिंदे यांनी अग्निसुरक्षेबाबत कठोर मार्गदर्शक तत्त्वे आणि नियमांचे पालन करण्याची गरज व्यक्त केली होती. त्याचबरोबर उच्च न्यायालयानेही अग्निशमन दलाच्या नियमांचे काटेकोरपणे पालन करण्याचा सल्लाही दिला आहे. मुंबईत एकूण मोठी ३४ फायर स्टेशन्स आणि १९ लहान स्टेशन्स आहेत. त्यांचे नियंत्रण कक्ष भायखळा मुख्यालयात आहे. मुंबई फायर ब्रिगेडमध्ये सध्या एकूण १ हजार ६८६ अग्निशामक, ४८३ चालक आणि ३००हून अधिक अधिकारी आहेत. भविष्यात पाच मोठी आणि एक लहान अग्निशमन केंद्र होणार आहेत.
