ठाणे : ग्रामीण भागातील नागरिकांना विविध शासकीय सेवा सहज, जलद आणि स्थानिक पातळीवर उपलब्ध करून देण्यासाठी ठाणे जिल्ह्यात ३८१ ‘आपले सरकार सेवा केंद्रे’ सुरू करण्याचा निर्णय घेण्यात आला आहे. जिल्ह्यातील २४४ ग्रामपंचायतींमध्ये ही केंद्रे सुरू करण्याची प्रक्रिया सुरू असून अंबरनाथ, भिवंडी, कल्याण, मुरबाड आणि शहापूर या ग्रामीण तालुक्यांचा त्यात समावेश आहे. या उपक्रमामुळे नागरिकांना विविध दाखले, प्रमाणपत्रे, शासकीय योजनांसाठी अर्ज तसेच इतर ऑनलाइन सेवांसाठी तालुका किंवा जिल्हा मुख्यालयात वारंवार जाण्याची गरज मोठ्या प्रमाणात कमी होणार आहे. सध्या अनेक ग्रामीण नागरिकांना उत्पन्न, रहिवासी, जात किंवा इतर प्रमाणपत्रांसाठी तसेच विविध सरकारी योजनांचा लाभ घेण्यासाठी लांबचा प्रवास करावा लागतो. यामध्ये वेळ आणि पैशाचा मोठा खर्च होत असून अनेकदा एका कामासाठी अनेक फेऱ्या माराव्या लागतात. ही गैरसोय दूर करण्यासाठी गावाच्या जवळच ‘आपले सरकार सेवा केंद्र’ उपलब्ध करून देण्याचा निर्णय घेण्यात आला आहे. यासाठी जिल्हाधिकारी कार्यालयाने केंद्रे सुरू करण्यासाठी जाहिरातही प्रसिद्ध केली आहे. या केंद्रांच्या माध्यमातून नागरिकांना विविध शासकीय विभागांच्या ऑनलाइन सेवा एकाच ठिकाणी मिळणार आहेत. उत्पन्न प्रमाणपत्र, रहिवासी प्रमाणपत्र, विविध दाखले, शैक्षणिक अर्ज, शिष्यवृत्ती प्रक्रिया, शासनाच्या विविध योजनांसाठी अर्ज तसेच इतर ऑनलाइन सेवांसाठी या केंद्रांचा लाभ घेता येणार आहे. विशेषतः ऑनलाइन प्रक्रियेची माहिती नसलेल्या नागरिकांना अर्ज भरणे, आवश्यक कागदपत्रे अपलोड करणे आणि शासकीय संकेतस्थळांवरील प्रक्रिया पूर्ण करण्यासाठी मार्गदर्शनही येथे उपलब्ध होणार आहे.
या उपक्रमामुळे ग्रामीण भागातील डिजिटल सेवा अधिक सक्षम होण्यास मदत होणार असून प्रशासनाच्या सेवा नागरिकांच्या दारात पोहोचवण्याचा उद्देश साध्य होणार आहे. ठाणे जिल्ह्यातील शहापूर, मुरबाड, भिवंडी, कल्याण आणि अंबरनाथ या तालुक्यांमध्ये अनेक गावे तालुका मुख्यालयापासून दूर असल्याने नागरिकांना शासकीय कामांसाठी मोठा प्रवास करावा लागतो. आता गावाजवळच सेवा केंद्र उपलब्ध झाल्यामुळे प्रवासाचा खर्च आणि वेळ दोन्हीची बचत होणार आहे. विद्यार्थ्यांना शिष्यवृत्ती, शैक्षणिक प्रवेश प्रक्रिया आणि विविध प्रमाणपत्रांसाठी आवश्यक असलेली ऑनलाइन कामे स्थानिक पातळीवर पूर्ण करता येणार आहेत. त्याचबरोबर शासनाच्या विविध योजनांसाठी अर्ज करण्याची प्रक्रिया अधिक सोपी होईल. जिल्ह्यातील २४४ ग्रामपंचायतींमध्ये एकूण ३८१ सेवा केंद्रे सुरू करण्यात येणार असून त्यामध्ये कल्याण तालुक्यात सर्वाधिक ११५, भिवंडीमध्ये १११, मुरबाडमध्ये ७६, शहापूरमध्ये ४८, अंबरनाथमध्ये २७ आणि ठाणे तालुक्यात ४ केंद्रांचा समावेश आहे. या केंद्रांमुळे ग्रामीण भागातील नागरिकांना आवश्यक शासकीय सेवा आपल्या गावातच उपलब्ध होणार असून प्रशासनाची कार्यक्षमता आणि डिजिटल सेवा वितरणालाही मोठी चालना मिळणार आहे. शासनाच्या सेवा अधिक सुलभ, पारदर्शक आणि नागरिकाभिमुख करण्याच्या दृष्टीने हा उपक्रम महत्त्वाचा मानला जात आहे.
