विरार : रिक्षातून प्रवास करताना हरवलेली सुमारे साडेतीन लाख रुपये किमतीच्या सोन्याच्या दागिन्यांची बॅग आचोळे पोलिसांनी अवघ्या चार तासांत शोधून काढत तक्रारदार महिलेकडे सुरक्षितपणे सुपूर्द केली. या जलद आणि प्रभावी कारवाईमुळे पोलिसांच्या तत्परतेचे कौतुक होत आहे. १९ सप्टेंबर २०२६ रोजी सकाळी साडेदहाच्या सुमारास नालासोपारा पूर्व येथील रहिवासी श्यामदुलारी सुरेश गुप्ता (वय ४३) या द्वारका हॉटेल ते वसई रेल्वे स्थानक या मार्गावर ऑटो रिक्षाने प्रवास करत होत्या. प्रवासादरम्यान त्यांची दागिन्यांनी भरलेली बॅग हरवल्याचे त्यांच्या लक्षात आले. या बॅगेमध्ये सुमारे १ लाख ५० हजार रुपये किमतीचे मंगळसूत्र, ४० हजार रुपयांचे पेंडंट, १ लाख ५० हजार रुपये किमतीच्या तीन सोन्याच्या अंगठ्या तसेच इतर मौल्यवान वस्तू असा एकूण सुमारे ३ लाख ४० हजार रुपयांचा ऐवज होता. बॅग हरवल्याचे लक्षात येताच त्यांनी तातडीने आचोळे पोलीस ठाण्यात धाव घेऊन तक्रार दाखल केली.
तक्रार मिळताच वरिष्ठ पोलीस निरीक्षक सुजितकुमार पवार यांच्या सूचनेनुसार गुन्हे प्रकटीकरण शाखेच्या पथकाने तातडीने तपास सुरू केला. द्वारका हॉटेल ते वसई रेल्वे स्थानक या संपूर्ण मार्गावरील सीसीटीव्ही फुटेज बारकाईने तपासण्यात आले. गर्दीच्या परिसरात प्रत्येक हालचालीचा मागोवा घेत पोलिसांनी अवघ्या चार तासांच्या आत हरवलेली बॅग शोधून काढली. बॅगेतील सर्व सोन्याचे दागिने आणि इतर साहित्य सुरक्षित अवस्थेत जप्त करून ते तक्रारदार महिलेकडे सुपूर्द करण्यात आले. मौल्यवान दागिने इतक्या कमी वेळात परत मिळाल्याने श्यामदुलारी गुप्ता यांनी आचोळे पोलिसांचे मनापासून आभार मानले. ही उल्लेखनीय कारवाई वरिष्ठ पोलीस निरीक्षक सुजितकुमार पवार, पोलीस निरीक्षक (गुन्हे) शकील शेख यांच्या मार्गदर्शनाखाली गुन्हे प्रकटीकरण शाखेच्या पथकाने यशस्वीपणे पार पाडली. या घटनेमुळे तक्रार मिळाल्यानंतर तातडीने तपास करून नागरिकांचा विश्वास जपण्याच्या आचोळे पोलिसांच्या कार्यक्षमतेची पुन्हा एकदा प्रचिती आली.
