मुंबई : पोस्ट सेवेपेक्षा सध्या कुरिअरने पत्र, कागदपत्र, वस्तू पाठविण्याकडे अधिक कल आहे. सायबर गुन्हेगारांनी कुरिअर सेवेचा वाढता वापर पाहून सर्वसामान्य नागरिकांना फसवणुकीचा हा मार्ग निवडला आहे. आपल्या नावाने आलेल्या कुरिअरमध्ये ड्रग्ज, महागड्या प्रतिबंधित वस्तू असल्याचे सांगून गुन्हा दाखल करण्याची धमकी दिली जाते. सीबीआय. गुन्हे शाखेचा अधिकारी असल्याचे भासवून लाखो रुपये उकळले जात आहेत. भोईवाडा, दादर, शिवाजी पार्कसह मुंबईत वेगवेगळ्या पोलिस ठाण्यात गुन्हे दाखल झाले आहेत. केईएमच्या डॉक्टराची फसवणूक केईएम रुग्णालयात निवासी महिला डॉक्टरला एका अनोळखी व्यक्तीचा फोन आला. कुरिअर कंपनीतून बोलत असल्याचे सांगत तैवानसाठी आपण पाठविलेल्या पार्सलमध्ये ड्रग्ज असल्याचे त्याने सांगितले. यावर डॉक्टरने आपण कोणतेच पार्सल पाठविले नसल्याचे सांगितले. त्यावर या व्यक्तीने आपण सायबर क्राइम अधिकाऱ्यांसोबत बोलून घ्या, असे सांगून एका मोबाइल क्रमांक दिला. डॉक्टरने त्या मोबाइल क्रमांकावर संपर्क साधला असता त्या तथाकथित सायबर क्राइम अधिकाऱ्याने डॉक्टरला आणखीनच घाबरवले. देशातील काही बँकामध्ये कोट्यवधी रुपये जमा झाल्याप्रकरणी काही दहशतवाद्यांना अटक करण्यात आली आहे. या दहशतवाद्यांनी आपले नाव घेतले असून देशातील तपास यंत्रणांच्या रडारवर आपण आहात, अशी माहिती दिल्यानंतर महिला डॉक्टर घाबरली. हे सर्व मिटविण्यासाठी ७ लाख ३३ हजार रुपये भरावे लागतील, असे सांगितले. महिला डॉक्टरने बँकेतील एफडी मोडून ही रक्कम भरली.
ड्रग्ज असल्याचे सांगून लाखोंवर डल्ला वरळी येथील एका खासगी कंपनीत अधिकारी असलेल्या दादरच्या विजयकुमार (बदललेले नाव) याला कुरिअर कंपनीतून फोन आला. कुरिअर कंपनीच्या कथित कर्मचाऱ्याने आपण रशिया येथे पाठविलेले पार्सलमध्ये ड्रग्ज होते. ते गुन्हे शाखेने जप्त केले आहेत, अशी माहिती दिली. हे ऐकून विजयकुमार याला धक्का बसला. आपण असे काही पार्सल पाठविलेच नसल्याचे त्याने सांगितले. त्यानंतर काही दिवसांनी एका अधिकाऱ्याचा विजयकुमारला फोन आला. त्याने या प्रकरणात गुन्हा दाखल करायचा नसल्यास एक ॲप डाऊनलोड करून माहिती भरून द्यावे लागेल, असे सांगितले. त्यावर विजयकुमारने ॲपवर जाऊन माहिती भरत असताना त्याच्या बँक खात्यावरून चार लाख ८३ हजार रुपये परस्पर काढण्यात आले. शिवाजी पार्क येथील महिलेलाही अशाच प्रकारे गंडा घालण्यात आला. पार्सलमध्ये ड्रग्ज आणि बँक खात्यातून मनी लॉंडरिंग झाले असल्याचे सांगून या महिलेकडून दोन लाख रुपये उकळण्यात आले.
