मुंबई : तोटय़ातील एसटी महामंडळाने आता स्वावलंबी झाले पाहिजे. एसटी महामंडळ कुठे कमी पडत असेल तर मी एसटीच्या पाठीशी उभा आहे, मात्र एसटी महामंडळाने स्वत:च्या पायावर उभे राहणे गरजेचे आहे. कुठे निधीची कमतरता भासली तर मागून घ्या. मी अर्थमंत्र्यांशी बोलून निधीची तरतूद करेन. एसटीने सार्वजनिक खासगी भागीदारी (पीपीपी) मॉडेल राबवून विकासाच्या दिशेने पावले टाकली पाहिजेत. एसटीच्या जमिनीचे मूल्यवर्धन करून त्यावर महामंडळाने उत्पन्नाचे स्रोत निर्माण करावेत, असे मत मुख्यमंत्री एकनाथ शिंदे यांनी एसटीच्या अमृतमहोत्सवी वर्धापन दिन सोहळय़ात केले.
एसटीचा अमृतमहोत्सवी वर्धापन दिन सोहळा बुधवारी नरिमन पॉइंट येथील यशवंतराव चव्हाण प्रतिष्ठान सभागृहात पार पडला. याप्रसंगी आमदार भरत गोगावले, एसटीचे सदिच्छादूत तथा अभिनेते मकरंद अनासपुरे, परिवहन व बंदरे विभागाचे प्रधान सचिव पराग जैन नैनुटिया, एसटीचे उपाध्यक्ष तथा व्यवस्थापकीय संचालक शेखर चन्ने, परिवहन आयुक्त विवेक भीमनवार उपस्थित होते. मुख्यमंत्री शिंदे म्हणाले, देशाच्या स्वातंत्र्याचा अमृत महोत्सवी वर्ष आणि एसटीचे अमृत महोत्सवी वर्ष हा दुग्धशर्करा योग आहे. एसटी महामंडळाने ‘बहुजन हिताय, बहुजन सुखाय’ या ब्रीद वाक्याप्रमाणे काम केले आहे. राज्य सरकारने जाहीर केलेल्या ७५ वर्षांवरील ज्येष्ठ नागरिकांना मोफत प्रवास आणि महिलांना ५० टक्के प्रवास सवलत अशा योजनांमुळे एसटीच्या प्रवासी संख्येत वाढ झाली आहे.
सध्या १६ हजार बस एसटीच्या ताफ्यात आहेत. लवकरच ७ हजार बस येतील. यासह बस स्थानकांवर जमीन उपलब्धतेनुसार मराठी चित्रपटांसाठी ‘मिनी थिएटर’ ही नवीन संकल्पना राबवण्यात येईल. शासकीय कर्मचाऱ्यांप्रमाणे एसटी कर्मचाऱ्यांना महागाई भत्ता देण्यासाठी राज्य सरकार सकारात्मक आहे, असेही मुख्यमंत्री शिंदे म्हणाले. ’धर्मवीर आनंद दिघे मोफत आरोग्य तपासणी योजना : एसटीचे कर्मचारी विशेषत: चालक, वाहक यांची दैनंदिन कामाची धावपळ असते. त्यांना जवळपास १० प्रकारच्या आरोग्य तपासण्या एसटी महामंडळाच्या माध्यमातून मोफत करून देण्यात येणार आहेत. या योजनेसाठी ‘धर्मवीर आनंद दिघे मोफत आरोग्य तपासणी योजना’ असे नावही कार्यक्रमावेळी मुख्यमंत्री शिंदे यांनी जाहीर केले. एसटी कर्मचारी पाल्यांना परदेशी शिक्षण अग्रीम योजना : एसटीच्या अधिकारी व कर्मचाऱ्यांची मुले जर परदेशात शिक्षणासाठी जाऊ इच्छित असतील, तर केवळ आर्थिक अडचणीमुळे त्यांची परदेशी शिक्षण घेण्याची संधी नाकारली जाऊ नये. यासाठी एसटी महामंडळातर्फे त्यांना बिनव्याजी १० लाख रुपये अग्रीम देण्यात येणार आहे.
