मुंबई : राज्याचे उपमुख्यमंत्री अजित पवार हे मतदारसंघ बदलाची चाचपणी करत असल्याच्या चर्चा सुरू असतानाच राष्ट्रवादीचे राष्ट्रीय कार्याध्यक्ष प्रफुल पटेल यांनी अजित पवार यांची उमेदवारी जाहीर केली आहे. अजित पवार हेच बारामती विधानसभेतून निवडणूक लढतील, अशी घोषणा प्रफुल पटेल यांनी केली आहे. पटेल यांच्या घोषणेनंतर अजित पवार यांच्या मतदारसंघ बदलण्याच्या चर्चांना आता पूर्णविराम मिळाला आहे. सुप्रिया सुळे विरुद्ध सुनेत्रा पवार या नणंद भावजय यांच्यात झालेल्या लोकसभा निवडणुकीत बारामती विधानसभेतून सुनेत्रा पवार यांना सुमारे २५ हजारांची पिछाडी मिळाली. बारामतीमध्ये हजारो कोटींचे विकासकामे करूनही बारामतीकरांनी साथ दिली नाही, अशी खंत गेली तीन महिने अजित पवार सतत बोलून दाखवत होते. तसेच बारामतीशिवाय माझ्याशिवाय दुसरा कुणी आमदार आल्यावर तुम्हाला कळेल. जिथे पिकते तिथे विकत नाही, अशी नाराजीही त्यांनी अनेक वेळा बोलून दाखवली. तसेच पुत्र जय पवार बारामतीमधून लढतील, असे संकेतही त्यांनी गेली दोन महिने दिले. मात्र पक्षातील पदाधिकारी आणि बारामतीमधील स्थानिक नेते अजित पवार यांच्या उमेदवारीसाठीच आग्रही होते. अजित पवार यांनीही अगदी शेवटापर्यंत उमेदवारीसंदर्भात संभ्रम ठेवला.
अजित पवार हे पक्षाचे राष्ट्रीय अध्यक्ष असल्याने ते स्वत:ची उमेदवारी जाहीर करू शकत नाहीत. त्यामुळे राष्ट्रीय कार्याध्यक्ष या नात्याने मी त्यांची उमेदवारी जाहीर करतो, अशी घोषणा प्रफुल पटेल यांनी केली. मात्र, बारामतीमधील व्यापारी मेळाव्यात बोलताना बारामतीतून आपणच उमेदवार असू, असे अप्रत्यक्षरित्या अजित पवार यांनी सांगितले. तुमच्या मनातील उमेदवार बारामतीत असेल फक्त घडाळ्याचे चिन्ह दाबा आणि त्याला विधानसभेत पाठवा, असे अजित पवार म्हणाले. परंतु जनतेच्या मनात उमेदवार कोण आहे, यासाठी मला सर्वेक्षण करावे लागेल, अशी फटकेबाजीही त्यांनी केली. महायुतीचे २३० जागांवर एकमत झाले आहे. उर्वरित जागांवर लवकरच चर्चा पूर्ण होईल. कुठेही महायुतीत मतभेद नाही, असे प्रफुल पटेल यांनी सांगितले. प्रत्येक निवडणुकीच्या अगोदर लोक या पक्षातून त्या पक्षात जात असतात. आउटगोइंग आणि इन्कमिंग हा विषय नाही. आज हरियाणाचा निकाल आल्यानंतर आउटगोइंग आणि इन्कमिंगवाले आता विचार करतील, असेही प्रफुल पटेल म्हणाले.
