पुणे : राज्यातील महिलांवरील छेडछाडीचे प्रमाण वाढले आहे. राज्यातील वेगवेगळ्या भागातून छेडछाडीच्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. अल्पवयीन मुलींचे आक्षेपार्ह फोटो व व्हिडीओ सोशल मीडियावर व्हायरल करणाऱ्या तरुणाला हडपसर पोलिसांनी सापळा रचून अटक केली आहे. तांत्रिक तपास करुन पोलिस आरोपीपर्यंत पोहोचले. किसन हनुमंत तोरडमल (वय २७, रा. शेवाळवाडी, हडपसर) असे अटक करण्यात आलेल्या आरोपीचे नाव आहे.
आरोपी तोरडमलने ओळखीतील मुलींचे नकळत आक्षेपार्ह फोटो व व्हिडीओ काढले होते. मोबाइलवरुन त्याने हे रेकॉर्ड केले होते. त्याने फोटो व व्हिडीओ मात्र सोशल मीडियावर व्हायरल केल्याचे उघडकीस आले होते. यानंतर मुलीने हडपसर पोलीस ठाण्यात तक्रार दिली होती. या गुन्ह्याचा पोलिसांनी तपास सुरू केला. तांत्रिक तपासात मिळालेल्या माहितीनुसार, पोलिसांनी तोरडमल याला अटक केली. परिमंडळ पाचचे पोलीस उपायुक्त डाॅ. राजकुमार शिंदे, सहायक आयुक्त अनुराधा उदमले यांच्या मार्गदर्शनाखाली वरिष्ठ पोलीस निरीक्षक संजय मोगले, गुन्हे शाखेचे निरीक्षक नीलेश जगदाळे, उपनिरीक्षक हसन मुलानी, सत्यवान गेंड, पोलीस कर्मचारी अविनाश गोसावी, महावीर लोंढे, प्रकाश सावंत, सुनील आव्हाड यांनी ही कामगिरी केली.
