पुणे : ‘सिग्नल का तोडला,’ असे विचारणाऱ्या वाहतूक पोलिसाची कॉलर पकडून शिवीगाळ, मारहाण करून गणवेश फाडणाऱ्या वाहनचालकाला न्यायालयाने दोन वर्षे सक्तमजुरीची शिक्षा सुनावली. घटनेचे प्रत्यक्षदर्शी साक्षीदार असलेल्या वकिलाने नोंदविलेली साक्ष महत्त्वाची ठरली. त्या आधारे अतिरिक्त सत्र न्यायाधीश ए. आय. पेरमपल्ली यांनी वाहतूक पोलिसाच्या बाजूने निकाल देऊन आरोपीला शिक्षा सुनावली. गफूर शहाबुद्दीन शेख (वय २७, रा. गुलटेकडी) असे शिक्षा झालेल्या वाहनचालकाचे नाव आहे. त्याच्याविरोधात पोलिस कर्मचारी आनंद प्रकाश गड्डुरे यांनी मार्केट यार्ड पोलिस ठाण्यात फिर्याद दिली होती. ही घटना १९ मार्च २०१४ रोजी सकाळी साडेदहा ते पावणेअकराच्या सुमारास गंगाधाम चौकात घडली. त्या वेळी फिर्यादी पुणे शहर वाहतूक नियंत्रण विभागांतर्गत स्वारगेट शाखेत कॉन्स्टेबल म्हणून नियुक्तीस होते. घटनेच्या दिवशी ते गंगाधाम चौकात वाहतूक नियमनाचे काम करीत होते. तेव्हा आरोपीने दोन वेळा गंगाधाम चौकातील सिग्नल तोडून वाहतूक नियमांचे उल्लंघन केले. त्याबाबत फिर्यादींनी जाब विचारला असता, चिडलेल्या आरोपीने त्यांची कॉलर पकडून शिवीगाळ करीत धमकावले. त्यांचा गणवेश फाडून त्यावरील नेमप्लेटचे नुकसान केले. या घटनेचे प्रत्यक्षदर्शी साक्षीदार असलेले ॲड. चेतन भुतडा यांनी तातडीने पोलिस नियंत्रण कक्षाला घडलेला प्रकार कळविला. त्यानंतर पोलिसांनी तातडीने घटनास्थळी धाव घेऊन आरोपीला पकडून सरकारी कामकाजात अडथळा आणणे, धमकावणे आदी कलमांनुसार गुन्हा आणि आरोपपत्र दाखल केले. या खटल्यात अतिरिक्त सरकारी वकील प्रदीप गेहलोत यांनी कामकाज पाहिले. त्यांनी सरकार पक्षातर्फे पाच साक्षीदार तपासले. त्यामध्ये प्रत्यक्षदर्शी साक्षीदार ॲड. भुतडा यांची साक्ष महत्त्वाचा पुरावा ठरला. त्या आधारे आरोपीला कठोर शिक्षा देण्याची मागणी सरकारी वकिलांनी केली.
‘आरोपीने सरकारी कर्मचाऱ्याला शिवीगाळ करून मारहाण केली आहे. त्याला शिक्षा ठोठावणे हा एकमेव पर्याय असून, समाजात सरकारी अधिकाऱ्यांवर हल्ल्यांच्या वाढत्या घटना पाहता यामुळे संबंधितांना चपराक बसेल,’ असे नमूद करीत न्यायालयाने आरोपीला शिक्षा ठोठावली.
वकील आणि पोलिस हे न्याययंत्रणेचे महत्त्वाचे घटक असून, सर्वसामान्यांच्या न्याय्य हक्कांसाठी ते कार्यरत असतात. पैकी एका घटकावर अन्याय झाल्यास, त्याला न्याय मिळवून देण्यासाठी दुसऱ्या घटकाने प्रयत्न केला पाहिजे. – ॲड. चेतन भुतडा, प्रत्यक्षदर्शी साक्षीदार
