मुंबई : मुंबईमध्ये एटीएम सेंटरमध्ये पैसे काढण्यासाठी किंवा भरण्यासाठी गेलेल्यांना बोलण्यात गुंतवून, त्यांच्याकडील कार्डची अदलाबदल करून फसवण्याचे घटना वाढल्या आहेत. मुंबई पोलिसांच्या गुन्हे शाखेने अशाप्रकारे हातचलाखी करणारी एक टोळी उघडकीस आणली आहे. यातील तिघांना अटक करण्यात आली असून, त्यांच्या अटकेने मुंबईतील अनेक गुन्हे उघडकीस आले आहेत. माझगाव येथील एक महिला १७ जानेवारीला ‘बँक ऑफ इंडिया’च्या एटीएम सेंटरमध्ये गेली होती. सीडीएम मशिनद्वारे ६० हजार रुपये खात्यावर भरताना दोन तरुण त्या ठिकाणी आले. मदत करण्याच्या बहाण्याने त्यांनी महिलेच्या हातामधील रोख रक्कम घेतली. ती मशिनमध्ये भरत असल्याचे भासवून हातचलाखी करून गायब केली. या प्रकरणात महिलेच्या तक्रारीवरून भायखळा पोलिस ठाण्यात गुन्हा दाखल करण्यात आला होता. अशाप्रकारच्या घटना वाढत असल्याने गुन्हे शाखा युनिट-३च्या पथकाने या गुन्ह्याचा तपास सुरू केला. प्रभारी पोलिस निरीक्षक दीपक सुर्वे यांच्या मार्गदर्शनाखाली पाटील, शिरसाठ, गोरेगावकर यांच्यासह मांगले, अनुभुले, कांबळे, गायकवाड, जाधव, तांबडे या पथकाने खबरे कामाला लावले आणि तांत्रिक पुरावे जमा केले.
तांत्रिक पुराव्यांच्या आधारे हे आरोपी छत्रपती शिवाजी महाराज टर्मिनस ते वडाळा लोकलने प्रवास करीत असल्याचे दिसले. पोलिसांनी या मार्गावर पाळत ठेवत आसीफ तोहीर अहमद शेख, राजेश दामोदर बेहरा आणि पंकजकुमार परशुराम ठाकूर यांना ताब्यात घेतले. त्यांच्या अटकेमुळे भायखळा, माता रमाबाई आंबेडकर मार्ग आणि खार पोलिस ठाण्यातील गुन्हे उघडकीस आले आहेत. यातील दोन आरोपींवर यापूर्वीचेही गुन्हे दाखल असल्याची माहिती पोलिसांनी दिली.
