शहापूर : ठाणे जिल्ह्यातील शहापूर विभागात आदिवासी विकास महामंडळाच्या धान्य खरेदीमध्ये झालेल्या १३७ कोटी रुपयांच्या घोटाळाप्रकरणी शासनाच्या निधीचा गैरवापर करून आर्थिक फसवणूक केल्याचा ठपका ठेवत प्रादेशिक व्यवस्थापक विजय गांगुर्डे आणि अन्य तीन अधिकाऱ्यांना निलंबित करण्यात आले आहे. आमदार संजय केळकर यांनी वर्षभर पाठपुरावा केल्यानंतर ही कारवाई झाली आहे. या अधिकाऱ्यांची लाचलुचपत विरोधी विभागामार्फत चौकशी करण्याची मागणीही केळकर यांनी केली आहे.
महामंडळाच्या शहापूर कार्यालयामार्फत २०१९-२० ते २०२१-२२ या हंगामात धान्य खरेदीत कोट्यवधींचा भ्रष्टाचार झाल्याच्या तक्रारी आदिवासी बांधव आणि शेतकऱ्यांनी आमदार संजय केळकर यांच्याकडे केल्या होत्या. धान्यखरेदी योजनेत कोट्यवधींचा भ्रष्टाचार अधिकारी, व्यापारी आणि राष्ट्रवादीच्या एका लोकप्रतिनिधीच्या संगनमताने झाल्याचा आरोप आमदार संजय केळकर यांनी करून या प्रकरणाची ‘एसआयटी’मार्फत चौकशी करण्याची मागणी उपमुख्यमंत्री देवेंद्र फडणवीस आणि आदिवासी विकास मंत्री विजयकुमार गावित यांच्याकडे केली आहे. आमदार संजय केळकर यांनी हा विषय सातत्याने विधानसभेत मांडून दोषींविरुद्ध कारवाईची मागणी केली होती. अखेर प्रशासनाने उच्चस्तरीय समिती नेमून अहवाल सादर केला. या अहवालात गंभीर बाबी उघड झाल्या आहेत.
