नवी दिल्ली : भारताला १९८३चा वन-डे क्रिकेट वर्ल्ड कप जिंकून देणाऱ्या क्रिकेट संघातील सदस्यांनी शुक्रवारी आंदोलक कुस्तीगिरांना पाठिंबा दिला आहे. त्याचबरोबर घाईघाईने कुठलाही निर्णय घेऊ नका, अशी विनंती त्यांनी मल्लांना केली; तसेच खेळाडूंचे प्रश्न ऐकले जातील आणि त्यावर तोडगा काढली जाईल, अशी आशा त्यांनी व्यक्त केली. या संबंधात क्रिकेटपटूंनी संयुक्त निवेदन प्रसिद्ध केले आहे.लैंगिक छळवणुकीचा आरोप असलेल्या खासदार बृजभूषण सिंह यांच्या अटकेसाठी कुस्तीगीर गेल्या अनेक दिवसांपासून आंदोलन करीत आहेत. या आंदोलनात साक्षी मलिक, विनेश फोगट, संगीता फोगट, बजरंग पुनिया हे आंतरराष्ट्रीय पदकवीर सहभागी आहेत. या सर्व आंदोलकांना १९८३च्या वर्ल्ड कप विजेत्या संघाने पाठिंबा दिला आहे. २५ जून १९८३ला भारतीय संघाने कपिलदेव यांच्या नेतृत्वाखाली वेस्ट इंडिजला धूळ चारली होती आणि भारतीय संघ विश्वविजेता ठरला होता. १९८३च्या वर्ल्ड कप विजेत्या भारतीय संघात सुनील गावसकर, के. श्रीकांत, मोहिंदर अमरनाथ, यशपाल शर्मा, संदीप पाटील, कपिलदेव, कीर्ती आझाद, रॉजर बिन्नी, मदन लाल, सय्यद किरमाणी, बलविंदर संधू यांचा समावेश होता.
‘चॅम्पियन कुस्तीगिरांचे आंदोलन ज्या पद्धतीने हाताळले गेले, ती दृष्य पाहून आम्ही व्यथित झालो आहोत. मेहनतीने मिळवलेली पदके हे खेळाडू गंगेत विसर्जित करायला जात होते, हे ऐकून आम्हाला चिंता वाटली. त्या पदकांमध्ये या मल्लांचे अनेक वर्षांचे प्रयत्न, त्याग, दृढनिश्चय आणि धैर्य यांचा समावेश आहे. या पदकांमध्ये केवळ मल्लांचा नाही, तर देशाचा अभिमान आणि आनंद आहे. या प्रकरणात मल्लांनी कुठलाही वादग्रस्त निर्णय घेऊ नये, अशी आमची त्यांना विनंती आहे. आशा आहे, त्यांचे प्रश्न सोडवले जातील. कायद्यानुसार सारे काही योग्य होईल,’ असे या विजेत्या संघाने प्रसिद्ध केलेल्या पत्रकात म्हटले आहे.
