मुंबई : भारतात बेकायदेशीररीत्या वास्तव्य करणाऱ्या १३ बांगलादेशी नागरिकांविरोधात मुंबई पोलिसांनी कारवाई केली आहे. खार आणि जुहू पोलिसांनी केलेल्या या कारवाईत काही संशयितांना ताब्यात घेण्यात आले असून, एका व्यक्तीला अटक करण्यात आली आहे. खार पोलिसांनी २९ सप्टेंबर रोजी सहा जणांना ताब्यात घेतले. यामध्ये इकबाल अकबरअली शेख ऊर्फ गौतम सुनिल दत्ता (३५) याला अटक करण्यात आली आहे. त्याच्यासह राणा मोल्ला इमदादुल मोल्ला ऊर्फ राणा शाह (२०), समीम मिझानूर सरदार ऊर्फ राजू नरेंद्र (२५), मोसमद मुंजिला खातून ऊर्फ सिला सरदार ऊर्फ रिया दत्ता (२३), माफुजा अख्तर लिमा मो. हाशम काझी ऊर्फ कविता शाह (२५) आणि हलीमा अख्तर मो. झिल्लू खान ऊर्फ मोनिका दत्ता (२६) यांचा समावेश आहे.
पोलिसांच्या तपासात इकबाल शेख याने बांगलादेशातून नागरिकांना भारतात आणण्यासाठी तसेच त्यांच्यासाठी ओळखपत्रे, रेल्वे प्रवास, निवास आणि रोजगाराची व्यवस्था करण्यास मदत केल्याचे समोर आल्याचे पोलिसांनी सांगितले. त्याच्या मोबाइलमध्ये विविध व्यक्तींच्या नावावर असलेल्या सुमारे ४० आधार कार्ड, पॅन कार्ड आणि इतर ओळखपत्रांचे फोटो आढळले आहेत. तसेच महिलांचे फोटो, क्यूआर कोड आणि रेल्वे तिकिटांशी संबंधित माहितीही पोलिसांना मिळाली आहे. घरझडतीदरम्यान बांगलादेशातील बांग्लालिंक कंपनीचे सिमकार्ड तसेच वेगवेगळ्या नावांवरील २० संशयित आधार कार्ड जप्त करण्यात आली आहेत. दरम्यान, १ ऑक्टोबर रोजी जुहू पोलिसांच्या दहशतवादविरोधी पथकाला नालासोपारा पूर्वेतील मोरेगाव परिसरात काही बांगलादेशी नागरिक राहत असल्याची माहिती मिळाली होती. त्यानुसार जय जिवदानी चाळीतील खोली क्रमांक ४१० येथे कारवाई करण्यात आली. या ठिकाणी एक पुरुष, चार महिला आणि दोन मुले आढळून आली. ताब्यात घेतलेल्या व्यक्तींमध्ये अकबर अजमीर सरदार (२६), रेजुका उजीर मोल्ला (२१), यास्मीन उजीर मोल्ला (२७), नसीमा बेगम उजीर मोल्ला (५३), खतीजा उजीर मोल्ला (१८) तसेच दोन अल्पवयीन मुलांचा समावेश आहे. पोलिसांच्या प्राथमिक चौकशीत संबंधित नागरिकांनी बांगलादेशातील मूळ पत्ते सांगितल्याचे आणि कोणतीही अधिकृत परवानगी न घेता भारतात प्रवेश केल्याचे निष्पन्न झाल्याचे सांगण्यात आले आहे. या प्रकरणात बनावट कागदपत्रे तयार करणारे, भारतात प्रवेश करण्यास मदत करणारे मध्यस्थ आणि इतर संबंधित व्यक्तींचा शोध सुरू आहे. दोन्ही प्रकरणांचा पुढील तपास खार आणि जुहू पोलिसांकडून करण्यात येत आहे.
