मुंबई : दादर येथील शिवाजी पार्क मैदानावर पोलिसांची परवानगी न घेता आंदोलन केल्याप्रकरणी मुंबई पोलिसांनी मोठी कारवाई केली आहे. कॉकरोच जनता पार्टीचे (CJP) संस्थापक अभिजीत दिपके, साम्या कोरडे यांच्यासह सुमारे ५०० आंदोलकांवर विविध कलमांनुसार गुन्हा दाखल करण्यात आला आहे. महात्मा गांधी जयंतीच्या दिवशी म्हणजेच २ ऑक्टोबर रोजी सायंकाळी हे आंदोलन करण्यात आले होते. निवडणूक आयोगाच्या कामकाजाविरोधात आणि मुख्य निवडणूक आयुक्तांच्या राजीनाम्याच्या मागणीसाठी CJPच्या वतीने शिवाजी पार्क येथे आंदोलनाची घोषणा करण्यात आली होती. मात्र, पोलिसांनी या आंदोलनाला पूर्वपरवानगी नाकारली होती. शिवाजी पार्क परिसर हा शांतता क्षेत्र (सायलन्स झोन) तसेच निवासी भागात येत असल्याने कायदा व सुव्यवस्थेचा प्रश्न निर्माण होऊ शकतो, असे कारण देत परवानगी देण्यात आली नव्हती.
पोलिसांच्या माहितीनुसार, परवानगी नाकारल्यानंतरही शेकडो आंदोलक शिवाजी पार्क परिसरात जमा झाले. त्यांनी सार्वजनिक रस्त्यावर सभा घेतली, ध्वनिक्षेपकाचा वापर केला आणि मोठ्या आवाजात घोषणाबाजी केल्याचा आरोप तक्रारीत करण्यात आला आहे. पोलिसांच्या आदेशाचे उल्लंघन करून बेकायदेशीर जमाव जमवल्याप्रकरणी ही कारवाई करण्यात आली आहे. आंदोलनाचे नेतृत्व करणारे अभिजीत दिपके, अजिंक्य शिंदे, प्रणय अहिरे, आशुतोष रांका, सौरभ दास यांच्यासह आफरीन नवाज, साम्या कोरडे, अंकित भारद्वाज, विजय मळगी आणि योगेश इंगळे या प्रमुख पदाधिकाऱ्यांची नावे गुन्ह्यात समाविष्ट करण्यात आली आहेत. या प्रकरणी भारतीय न्याय संहितेच्या (BNS) कलम १८९(२) अंतर्गत बेकायदेशीर जमाव जमवणे, कलम २२३ अंतर्गत सरकारी आदेशाचे उल्लंघन करणे तसेच महाराष्ट्र पोलीस कायद्याच्या कलम ३७(१), ३७(३) आणि १३५ अंतर्गत गुन्हे दाखल करण्यात आले आहेत. सार्वजनिक वाहतुकीला अडथळा निर्माण करणे, ध्वनी प्रदूषणाच्या नियमांचे उल्लंघन करणे आणि प्रतिबंधात्मक आदेशांचा भंग केल्याचा ठपका आंदोलकांवर ठेवण्यात आला आहे. या प्रकरणी मुंबई पोलिसांकडून पुढील कायदेशीर चौकशी सुरू आहे.
