मुंबई : महाराष्ट्र लोकसेवा आयोगाच्या (एमपीएससी) विविध मागण्यांसाठी आंदोलन करणाऱ्या विद्यार्थ्यांच्या शिष्टमंडळासोबत मुख्यमंत्री देवेंद्र फडणवीस यांनी बुधवारी सविस्तर चर्चा केली. विद्यार्थ्यांनी मांडलेल्या मागण्यांबाबत सरकार सकारात्मक असल्याचे मुख्यमंत्र्यांनी सांगितले. या बैठकीत अनेक महत्त्वाचे निर्णय घेण्यात आले असून, त्यानंतर विद्यार्थ्यांनी २ ऑक्टोबर रोजी पुकारलेले आंदोलन तात्पुरते स्थगित करण्याची घोषणा केली.
एमपीएससीचे अध्यक्ष आणि सदस्य यांच्या नियुक्ती तसेच हटवण्याबाबत संविधानातील कलम ३१७ नुसार कारवाई करण्यात यावी, अशी विद्यार्थ्यांची प्रमुख मागणी होती. या पार्श्वभूमीवर मुख्यमंत्र्यांनी सह्याद्री अतिथिगृहात एमपीएससी विद्यार्थ्यांसोबत बैठक घेत त्यांच्या समस्या जाणून घेतल्या. बैठकीत एमपीएससीचे माजी आणि विद्यमान अध्यक्ष तसेच सदस्य यांच्या कामकाजासंदर्भात तीन महिन्यांत न्यायालयीन चौकशी करण्यात येणार असल्याचे सांगण्यात आले. चौकशीच्या निष्कर्षांच्या आधारे पुढील कारवाई केली जाईल, असे मुख्यमंत्र्यांनी स्पष्ट केले. तसेच एमपीएससीच्या सचिवांची तातडीने बदली करण्यात येईल, असे आश्वासनही देण्यात आले. एमपीएससीच्या परीक्षा यापुढे ऑफलाइन पद्धतीनेच घेण्यात येणार असून, विद्यार्थ्यांशी चर्चा केल्याशिवाय परीक्षा पद्धतीत कोणताही बदल केला जाणार नाही, असे मुख्यमंत्र्यांनी सांगितले. आगामी भरती प्रक्रियेत मोठ्या प्रमाणावर पदे भरण्याची तयारी सरकारने सुरू केली आहे. विशेषतः ३ जानेवारीच्या गट ‘क’ परीक्षेसाठी पदसंख्या वाढवण्याची विद्यार्थ्यांची मागणी मान्य करण्यात आली असून, गट ‘क’मध्ये विक्रमी संख्येने पदभरती केली जाणार आहे. एमपीएससीच्या विविध परीक्षांसाठी विद्यार्थ्यांना वारंवार कागदपत्रे सादर करावी लागू नयेत, यासाठी एकाच कार्डच्या माध्यमातून सर्व परीक्षा देता येतील, अशी यंत्रणा तयार करण्यात येणार आहे. हे कार्ड विद्यार्थ्यांना माफक दरात उपलब्ध करून देण्याचे नियोजन आहे. तसेच पुढील तीन वर्षांची पदभरती एकाच वेळी जाहीर करण्याची तयारी सरकारकडून करण्यात येणार आहे. निवृत्त होणाऱ्या कर्मचाऱ्यांच्या रिक्त पदांसाठी भरती प्रक्रिया एक वर्ष आधीच सुरू करण्याचा निर्णय घेण्यात येणार आहे. पुढील एका महिन्यात संपूर्ण भरतीचे वेळापत्रक निश्चित करण्याचे नियोजन सरकारने केले आहे. सरकारच्या आश्वासनानंतर विद्यार्थ्यांनी आंदोलन स्थगित केले असून, आता पुढील निर्णयांकडे विद्यार्थ्यांचे लक्ष लागले आहे.
