वृत्तसंस्था : तामिळनाडूचे मुख्यमंत्री सी. जोसेफ विजय आणि पंतप्रधान नरेंद्र मोदी हे ११ ऑक्टोबर रोजी प्रथमच एकाच व्यासपीठावर दिसण्याची शक्यता आहे. चेन्नई मेट्रोच्या दुसऱ्या टप्प्यातील पूनमल्ली–वडापलानी मार्गाच्या उद्घाटन सोहळ्यानिमित्त हा कार्यक्रम आयोजित करण्यात आला असून, यावेळी दोन्ही नेते एकत्र उपस्थित राहणार आहेत. तामिळनाडू विधानसभा निवडणुकीत पहिल्याच प्रयत्नात सी. जोसेफ विजय यांच्या पक्षाने सत्ता स्थापन केल्यानंतर हा त्यांचा पंतप्रधान मोदींसोबतचा पहिला सार्वजनिक कार्यक्रम ठरणार आहे. उद्घाटनानंतर चेन्नई मेट्रो रेल प्रकल्पाच्या दुसऱ्या टप्प्यातील पहिला कार्यान्वित विभाग प्रवाशांसाठी खुला करण्यात येणार आहे. तसेच पंतप्रधान नरेंद्र मोदी पूनमल्ली ते पोरूर या मार्गावर मेट्रोने प्रवास करण्याची शक्यता असून, या दौऱ्यात आयआयटी मद्रासला भेट देण्याचाही त्यांचा कार्यक्रम असू शकतो.
या दौऱ्यात पंतप्रधान मोदी वेल्लोर विमानतळासह विविध विकास प्रकल्पांचे उद्घाटन आणि काही नवीन प्रकल्पांची पायाभरणीही करणार असल्याची माहिती सूत्रांनी दिली आहे. चेन्नई मेट्रोचा १४.६४ किलोमीटर लांबीचा पूनमल्ली–वडापलानी मार्ग पूर्णपणे कार्यान्वित होण्यासाठी सज्ज झाला असून, या मार्गावर एकूण ११ स्थानके आहेत. रेल्वे सुरक्षा आयुक्तांकडून आवश्यक मंजुरी मिळाल्यानंतर हा मार्ग सुरू केला जाणार आहे. चेन्नई मेट्रो विस्ताराच्या दुसऱ्या टप्प्यातील २६ किलोमीटर लांबीच्या लाईटहाऊस–पूनमल्ली कॉरिडॉरचा हा महत्त्वाचा भाग असून, संपूर्ण दुसऱ्या टप्प्यात तीन कॉरिडॉरद्वारे सुमारे ११८.९ किलोमीटरचे मेट्रो नेटवर्क उभारले जात आहे. मंजुरीपूर्वी सिग्नलिंग प्रणाली, ट्रॅक कार्यक्षमता, ट्रेन संचालन आणि संरचनात्मक सुरक्षिततेसह सर्व आवश्यक चाचण्या यशस्वीरीत्या पूर्ण करण्यात आल्या आहेत. प्रारंभी या मार्गावर मेट्रो सेवा दर १० मिनिटांनी धावणार असून, नियमित सेवेसाठी सुमारे १५ मेट्रो गाड्या तैनात केल्या जाण्याची शक्यता आहे.
