वृत्तसंस्था : मराठी चित्रपटसृष्टीसाठी अभिमानाचा आणि ऐतिहासिक क्षण ठरावा अशी मोठी कामगिरी ‘गोंधळ’ या मराठी चित्रपटाने केली आहे. तब्बल अकरा वर्षांनंतर मराठी चित्रपटाला पुन्हा एकदा भारताची अधिकृत ऑस्कर प्रवेशिका म्हणून निवड करण्यात आली असून, आता ‘गोंधळ’ ९९व्या अकादमी पुरस्कारांमध्ये भारताचे प्रतिनिधित्व करणार आहे. यापूर्वी २०१५ मध्ये ‘कोर्ट’ या मराठी चित्रपटाला हा बहुमान मिळाला होता. ‘गोंधळ’चे लेखक, दिग्दर्शक आणि निर्माते संतोष डावखर यांनी ही निवड महाराष्ट्र आणि संपूर्ण मराठी चित्रपटसृष्टीसाठी अभिमानाची, भावनिक आणि ऐतिहासिक असल्याची भावना व्यक्त केली. यंदाच्या निवड प्रक्रियेत ‘डोरोथी’, ‘बालन’, ‘बायसन’, ‘अंग’, ‘मैं वापस आऊंगा’, ‘धुरंधर-१’, ‘धुरंधर-२’, ‘इक्कीस’, ‘बॉर्डर-२’, ‘देऊळबंद-२’ आणि ‘द शेप ऑफ मोमो’ यांसारखे विविध भारतीय भाषांतील अनेक चर्चित आणि मोठ्या निर्मितीमूल्यांचे चित्रपट स्पर्धेत होते. काही चित्रपटांनी आंतरराष्ट्रीय चित्रपट महोत्सवांमध्येही विशेष छाप पाडली होती. अशा तगड्या स्पर्धेत महाराष्ट्राच्या सांस्कृतिक परंपरा, लोकजीवन आणि भावविश्व प्रभावीपणे मांडणाऱ्या ‘गोंधळ’ची भारताच्या अधिकृत ऑस्कर प्रवेशिकेसाठी निवड होणे ही मराठी चित्रपटसृष्टीसाठी मोठी उपलब्धी मानली जात आहे. मराठी मातीचा सुगंध जपत जागतिक दर्जाच्या तांत्रिक गुणवत्तेसह हा चित्रपट साकारण्यात आल्याचा विश्वास संतोष डावखर यांनी व्यक्त केला.
संतोष डावखर यांच्या मते, ‘गोंधळ’चा गाभा भारतीय संस्कृतीशी जोडलेला असला तरी चित्रपटाची सिनेमॅटिक भाषा, तांत्रिक दर्जा आणि निर्मितीमूल्ये आंतरराष्ट्रीय स्तरावर स्पर्धा करण्यास सक्षम आहेत. भारत सरकार, फिल्म फेडरेशन ऑफ इंडिया (FFI) आणि निवड समितीने चित्रपटावर दाखविलेल्या विश्वासाबद्दल त्यांनी कृतज्ञता व्यक्त केली. चित्रपटातील प्रत्येक कलाकार, तंत्रज्ञ आणि संपूर्ण चमूने प्रामाणिकपणे आणि अत्यंत मेहनतीने काम केल्यामुळेच हा यशाचा टप्पा गाठता आल्याचे त्यांनी सांगितले. आता ९९व्या अकादमी पुरस्कारांसाठी चित्रपटाच्या आंतरराष्ट्रीय प्रचार मोहिमेला लवकरच सुरुवात होणार असून त्यासाठी व्यापक आणि नियोजनबद्ध कृती आराखडा तयार करण्यात आला आहे. ‘गोंधळ’ हा चित्रपट पाच भारतीय भाषांमध्ये प्रदर्शित करण्याची तयारी पूर्ण झाली असून जागतिक स्तरावरही त्याच्या प्रदर्शनाचे नियोजन करण्यात आले आहे. भारतातील तसेच परदेशातील प्रदर्शनाच्या तारखा लवकरच जाहीर केल्या जाणार आहेत. बांधकाम व्यावसायिक असलेल्या संतोष डावखर यांनी साहित्य, संस्कृती, कला, निसर्ग, प्राणी आणि पक्षी संवर्धन क्षेत्रातही अनेक सामाजिक उपक्रम राबविले आहेत. त्यांच्या संकल्पनेतून आयोजित विविध प्रदर्शनांनाही नागरिकांचा मोठा प्रतिसाद मिळत असतो. ‘गोंधळ’ मर्यादित कालावधीसाठी चित्रपटगृहांत प्रदर्शित होणार असल्याने प्रत्येक भारतीयाने हा चित्रपट पाहावा, आपल्या कुटुंबीयांना आणि मित्रांना तो पाहण्यासाठी प्रोत्साहित करावे आणि भारताच्या ऑस्कर प्रवासात सहभागी व्हावे, असे आवाहन संतोष डावखर यांनी केले आहे. त्यांच्या मते, प्रेक्षकांचा प्रत्येक प्रतिसाद आणि प्रत्येक तिकीट भारताच्या ऑस्कर मोहिमेला अधिक बळ देणारे ठरणार आहे.
