मिरा रोड : मिरा-भाईंदर शहरातील अवघ्या अडीच वर्षांच्या श्लोका निमित शाह हिने आपल्या विलक्षण बुद्धिमत्ता, स्मरणशक्ती आणि शिकण्याच्या क्षमतेच्या जोरावर जागतिक विक्रम प्रस्थापित करत शहराच्या शिरपेचात मानाचा तुरा रोवला आहे. तिच्या या उल्लेखनीय कामगिरीची बुक ऑफ वर्ल्ड रेकॉर्ड्समध्ये अधिकृत नोंद करण्यात आली असून तिला प्रमाणपत्र प्रदान करण्यात आले आहे. यादृच्छिक (Randomly) पद्धतीने दाखविण्यात आलेल्या इंग्रजी वर्णमालेच्या फ्लॅश कार्ड्सवरून अनेक शब्द अचूक ओळखण्याची अनोखी कामगिरी श्लोकाने केली. या कामगिरीमुळे “यादृच्छिक पद्धतीने सादर केलेल्या इंग्रजी वर्णमालेच्या फ्लॅश कार्ड्सवरून अनेक शब्द अचूक ओळखणारी सर्वात लहान वयाची बालिका” हा विश्वविक्रम तिच्या नावावर नोंदविण्यात आला आहे.
बुक ऑफ वर्ल्ड रेकॉर्ड्सने दिलेल्या प्रमाणपत्रात श्लोकाच्या विलक्षण स्मरणशक्ती, उत्कृष्ट शिकण्याची क्षमता आणि शब्द अचूक ओळखण्याच्या कौशल्याचे विशेष कौतुक करण्यात आले आहे. तिच्या नैसर्गिक प्रतिभा, बौद्धिक विकास आणि समर्पणाची दखल घेत हा जागतिक सन्मान प्रदान करण्यात आला आहे. अवघ्या अडीच वर्षांच्या वयात मिळविलेल्या या यशामुळे श्लोकाचे सर्व स्तरांतून अभिनंदन होत असून मिरा-भाईंदर शहरासाठी ही अभिमानाची बाब मानली जात आहे. तिच्या या यशामागे पालकांचे मार्गदर्शन, सातत्यपूर्ण प्रयत्न आणि योग्य प्रशिक्षण यांचा महत्त्वाचा वाटा असल्याचेही सांगितले जात आहे. श्लोकाच्या या यशामुळे लहान वयातही योग्य प्रोत्साहन आणि मार्गदर्शन मिळाल्यास मुले जागतिक स्तरावर उल्लेखनीय कामगिरी करू शकतात, याची पुन्हा एकदा प्रचिती आली आहे.
