मुंबई : एसटी प्रवासादरम्यान शासनाच्या विविध प्रवासी सवलतींचा लाभ घेण्यासाठी NCMC (National Common Mobility Card) स्मार्ट कार्ड अनिवार्य करण्याच्या निर्णयाला राज्य सरकारने १ सप्टेंबर २०२६ पर्यंत मुदतवाढ दिली आहे. अनेक ज्येष्ठ नागरिक आणि महिला प्रवाशांनी स्मार्ट कार्डसाठी नोंदणी केली असली तरी त्यांना अद्याप कार्ड प्रत्यक्षात प्राप्त झालेले नाही. त्यामुळे केवळ कार्ड उपलब्ध नसल्यामुळे पात्र प्रवाशांना शासनाच्या सवलतींपासून वंचित राहावे लागू नये, यासाठी हा महत्त्वाचा निर्णय घेण्यात आला आहे. परिवहन मंत्री तथा महाराष्ट्र राज्य मार्ग परिवहन महामंडळाचे (एमएसआरटीसी) अध्यक्ष प्रताप सरनाईक यांनी ही माहिती दिली. राज्य शासनामार्फत अमृत ज्येष्ठ नागरिकांना एसटी प्रवासात मोफत प्रवासाची सुविधा देण्यात येते, तर ज्येष्ठ नागरिक आणि महिला प्रवाशांना प्रवासभाड्यात ५० टक्के सवलत दिली जाते. या सवलती अधिक पारदर्शक, तंत्रज्ञानाधारित आणि सुलभ पद्धतीने उपलब्ध करून देण्यासाठी १ ऑगस्टपासून NCMC स्मार्ट कार्ड अनिवार्य करण्याचा निर्णय यापूर्वी जाहीर करण्यात आला होता. मात्र, राज्यभरातील लाखो लाभार्थ्यांनी नोंदणी करूनही अनेकांना अद्याप स्मार्ट कार्ड मिळालेले नसल्याचे लक्षात आल्यानंतर परिवहन विभागाने मुदतवाढ देण्याचा निर्णय घेतला आहे. त्यामुळे वाढीव मुदतीदरम्यान पात्र लाभार्थ्यांना पूर्वीप्रमाणेच शासनाच्या प्रवासी सवलतींचा लाभ घेता येणार आहे.
याबाबत बोलताना परिवहन मंत्री प्रताप सरनाईक यांनी सांगितले की, एसटीची प्रवासी सवलत ही सर्वसामान्यांच्या हितासाठी असून तांत्रिक किंवा प्रक्रियात्मक कारणांमुळे कोणत्याही पात्र ज्येष्ठ नागरिक अथवा महिला प्रवाशाची गैरसोय होऊ नये, ही सरकारची भूमिका आहे. त्यामुळे NCMC स्मार्ट कार्ड अनिवार्य करण्याच्या अंमलबजावणीला १ सप्टेंबरपर्यंत मुदतवाढ देण्याचा निर्णय घेण्यात आला आहे. या निर्णयामुळे विशेषतः ग्रामीण भागातील, दुर्गम भागातील तसेच अर्ज करूनही कार्ड न मिळालेल्या लाखो महिला आणि ज्येष्ठ नागरिकांना मोठा दिलासा मिळाला आहे. दररोज राज्यभरात एसटीच्या माध्यमातून लाखो महिला आणि ज्येष्ठ नागरिक प्रवास करत असल्याने या मुदतवाढीचा मोठा लाभ त्यांना होणार आहे. दरम्यान, परिवहन विभागाने सर्व पात्र प्रवाशांना वाढीव मुदतीचा उपयोग करून NCMC स्मार्ट कार्डची प्रक्रिया शक्य तितक्या लवकर पूर्ण करण्याचे आवाहन केले आहे. १ सप्टेंबरनंतर स्मार्ट कार्डची सक्ती लागू होण्याची शक्यता असल्याने लाभार्थ्यांनी वेळेत कार्ड मिळवून भविष्यातील गैरसोय टाळावी, असेही प्रशासनाने स्पष्ट केले आहे. स्मार्ट कार्ड प्रणालीमुळे प्रवासी सवलतींची प्रक्रिया अधिक पारदर्शक, जलद आणि तंत्रज्ञानाधारित होणार असून, भविष्यात एसटी सेवांचा लाभ घेणाऱ्या पात्र प्रवाशांसाठी ही प्रणाली अधिक सोयीची ठरणार असल्याचा विश्वास परिवहन विभागाने व्यक्त केला आहे.
