पुणे : शहरातील गणेश पेठ, भवानी पेठ आणि नाना पेठ परिसरात अन्न व औषध प्रशासनाने (एफडीए) मोठी कारवाई करत तब्बल ४५ लाख ५० हजार रुपयांचा संशयित अन्नसाठा जप्त केला आहे. निकृष्ट दर्जाचे अन्नपदार्थ, चुकीचे लेबलिंग, नियमांचे पालन न करता विक्रीसाठी ठेवलेला माल तसेच आवश्यक परवाना नसल्याच्या संशयावरून ही कारवाई करण्यात आली. जप्त करण्यात आलेल्या सर्व अन्नपदार्थांचे नमुने प्रयोगशाळेत तपासणीसाठी पाठविण्यात आले असून अहवालानंतर पुढील कायदेशीर कारवाई केली जाणार आहे. एफडीएच्या पथकाने गणेश पेठेतील मे. वर्धमान एंटरप्रायझेस येथे छापा टाकून अन्नामलाई मिठाई, इमली जेली आणि लव्हली कँडी असा ७ लाख ८२ हजार ९३२ रुपयांचा माल जप्त केला. तपासणीदरम्यान या उत्पादनांवरील आवश्यक माहिती अपुरी असल्याचे तसेच लेबलिंगमध्ये त्रुटी आढळल्याचे अधिकाऱ्यांनी सांगितले. याच परिसरातील मे. न्यू पांडियन एंटरप्रायझेस येथून सोनपापडी, चिक्की आणि रसमलाई बर्फी असा ५८ हजार ६२० रुपयांचा संशयित अन्नसाठा जप्त करण्यात आला. भवानी पेठेतील गुरुनानक हायस्कूलजवळील माणिक सोहनलाल परमार यांच्या गोदामावर टाकलेल्या छाप्यात सर्वाधिक कारवाई करण्यात आली. या ठिकाणी सेंटर फिल्ड कँडी आणि चॉकलेट वेफर रोल असा ३६ लाख ३९ हजार ३८० रुपयांचा साठा आढळून आला. तपासणीत या गोदामाकडे अन्न व्यवसायासाठी आवश्यक परवाना किंवा नोंदणी नसल्याचेही समोर आले. त्यामुळे संबंधितांवर अन्न सुरक्षा कायद्यानुसार कारवाईची प्रक्रिया सुरू करण्यात आली आहे.
याशिवाय नाना पेठेतील मे. गोयल सेल्स कॉर्पोरेशन येथून काजू, बदाम, मनुका, मटण मसाला आणि मोहरी असा ६९ हजार ८३५ रुपयांचा माल जप्त करण्यात आला. या उत्पादनांवर चुकीचे ब्रँडिंग करण्यात आल्याचा संशय व्यक्त करण्यात आला आहे. तसेच मे. विजय लक्ष्मी ट्रेडर्स येथून ‘०’ नंबर राईस शेव आणि फरसाणही जप्त करण्यात आले असून त्यांचीही प्रयोगशाळेत तपासणी केली जाणार आहे. दरम्यान, अन्न सुरक्षा नियमांचे उल्लंघन करणाऱ्यांविरोधात एफडीएने राज्यातील इतर भागांतही कारवाईचा धडाका सुरू ठेवला आहे. सातारा आणि सांगली जिल्ह्यातील पाच हॉटेल, रेस्टॉरंट आणि कँटिनचे परवाने निलंबित करण्यात आले आहेत. साताऱ्यातील न्यू सम्राट हॉटेल, हॉटेल केशर आणि हॉटेल लक्ष्मी गार्डन फॅमिली रेस्टॉरंट, तसेच सांगलीतील मैत्री चायनीज सेंटर आणि हॉटेल ‘२५२० गावरान तडका’ यांच्यावर ही कारवाई करण्यात आली. याशिवाय सातारा जिल्ह्यातील कराड तालुक्यात कृत्रिम दूध तयार करण्याचा प्रकार उघडकीस आला. या कारवाईदरम्यान पाच लिटर म्हशीचे दूध आणि भेसळीसाठी वापरले जाणारे ४.४ किलो रिफाइंड पाम ऑइल जप्त करण्यात आले. अन्नपदार्थांची गुणवत्ता, सुरक्षितता आणि ग्राहकांच्या आरोग्याशी तडजोड करणाऱ्यांविरोधात अशा कारवाया पुढेही सुरू राहतील, असा इशारा अन्न व औषध प्रशासनाने दिला आहे. नागरिकांनीही पॅकबंद अन्नपदार्थ खरेदी करताना लेबल, उत्पादनाची माहिती, परवाना आणि गुणवत्ता तपासूनच खरेदी करावी, असे आवाहन प्रशासनाकडून करण्यात आले आहे.
