नाशिक : भरदिवसा स्वतःला पोलीस असल्याची बतावणी करत बंदुकीचा धाक दाखवून ७० लाख रुपयांची रोख रक्कम लुटणाऱ्या आंतरराज्यीय टोळीचा नाशिक पोलिसांनी पर्दाफाश केला आहे. गुन्हे शाखेने एका महिलेसह चार आरोपींना अटक करून त्यांच्याकडून ८२ लाख १० हजार रुपयांचा मुद्देमाल जप्त केला आहे. पंचवटी परिसरातील दिंडोरी रोड येथे काही आरोपी सरकारी दिवा लावलेल्या इनोव्हा कारमधून आले आणि त्यांनी स्वतःची ओळख पोलीस अधिकारी म्हणून करून दिली. त्यानंतर त्यांनी तक्रारदाराला बंदुकीचा धाक दाखवत जबरदस्तीने कारमध्ये बसविले. कारमध्येच त्याच्याकडील पिशवीतील ७० लाख रुपयांची रोख रक्कम आणि मोबाईल फोन हिसकावून घेतला. तसेच जीवे मारण्याची धमकी देत शिवीगाळ करून तक्रारदाराला मुंबई–पुणे महामार्गावर सोडून आरोपी पसार झाले. या घटनेनंतर पंचवटी पोलीस ठाण्यात दरोड्याचा गुन्हा दाखल करण्यात आला. गंभीर स्वरूपाचा हा गुन्हा उघडकीस आणण्यासाठी पोलीस आयुक्त संदीप कर्णिक, पोलीस उपायुक्त किरणकुमार चव्हाण आणि गुन्हे शाखेचे पोलीस उपायुक्त संदीप मिटके यांच्या मार्गदर्शनाखाली वरिष्ठ पोलीस निरीक्षक डॉ. अंचल मुदगल यांच्या नेतृत्वात सात विशेष तपास पथके स्थापन करण्यात आली. मानवी माहिती, तांत्रिक विश्लेषण, गोपनीय माहिती आणि घटनास्थळावरील परिस्थितीजन्य पुराव्यांच्या आधारे पोलिसांनी आरोपींचा माग काढला. तपासादरम्यान एका आरोपीची ओळख पटल्याने त्याच्या हालचालींवर लक्ष ठेवण्यात आले. रेल्वेमार्गे नाशिक रोड स्थानकावर येणार असल्याची माहिती मिळाल्यानंतर सापळा रचण्यात आला, मात्र आरोपी मुंबईकडे परतल्याने जोगेश्वरी, अंधेरी, डोंबिवली आणि वसई-विरार परिसरात शोधमोहीम राबविण्यात आली.
सातत्यपूर्ण पाठलाग आणि तांत्रिक माहितीच्या आधारे पोलिसांनी अखेर उमाशंकर वर्मा (४०, उत्तर प्रदेश), सुजितकुमार दुबे (३२, झारखंड), निलेश पका (२७, वसई) आणि संगीता अहिरे (४३, नाशिक) यांना अटक केली. आरोपींकडून ५५ लाख १० हजार रुपयांची रोख रक्कम, गुन्ह्यात वापरलेली सरकारी दिवा असलेली गोल्डन इनोव्हा कार, एक बंदूक, एक अग्निशस्त्र तसेच विविध बनावट शासकीय कागदपत्रे जप्त करण्यात आली. यामध्ये आयकर विभाग, गृह विभाग, केंद्रीय अन्वेषण विभाग (सीबीआय), लाचलुचपत प्रतिबंधक विभाग आणि रेल्वे विभागाची बनावट ओळखपत्रे, बनावट रेल्वे पास तसेच विविध सरकारी विभागांचे बनावट रबरी शिक्के यांचाही समावेश आहे. जप्त करण्यात आलेल्या मुद्देमालाची एकूण किंमत ८२ लाख १० हजार रुपये असल्याची माहिती पोलिसांनी दिली. प्राथमिक तपासात तक्रारदाराकडे मोठ्या प्रमाणात रोख रक्कम असल्याची माहिती आरोपींना आधीपासूनच मिळाल्याचे समोर आले असून, त्यानुसार त्यांनी नियोजनबद्ध पद्धतीने दिंडोरी रोडवर सापळा रचून दरोडा टाकल्याचे निष्पन्न झाले आहे. मुख्य आरोपी उमाशंकर वर्मा हा सराईत गुन्हेगार असून, त्याचे इतर आरोपींशी संबंध कसे प्रस्थापित झाले आणि या टोळीने यापूर्वी अशाच प्रकारचे गुन्हे केले आहेत का, याचा तपास सुरू आहे. गुन्ह्यात वापरलेल्या वाहनांची छायाचित्रेही पोलिसांनी प्रसिद्ध केली असून, अशा प्रकारे फसवणूक किंवा लूट झालेल्या नागरिकांनी पुढे येऊन पोलिसांशी संपर्क साधावा, असे आवाहन नाशिक पोलिसांनी केले आहे.
