मुंबई : मुंबई उपनगरातील महिलांमध्ये आरोग्यदायी जीवनशैली, संतुलित आहार आणि स्वयंपाकातील तेलाचा नियंत्रित वापर याबाबत जनजागृती करण्यासाठी इंटरनॅशनल असोसिएशन ऑफ डायटिशियन्स फॉर मेटाबॉलिक हेल्थ अँड न्यूट्रिशन (IADMN) यांच्या वतीने ‘तेल कमी – गॅस बचत, अधिक आरोग्य’ या विषयावर विशेष पोषण जनजागृती अभियानाचे आयोजन करण्यात आले. दादर येथील भाजप कार्यालयात झालेल्या या कार्यक्रमाला मुंबई आणि परिसरातील विविध भागांतून आलेल्या शेकडो महिलांनी उत्स्फूर्त प्रतिसाद दिला. अभियानाचा मुख्य उद्देश महिलांना संतुलित आहार, स्वयंपाकात तेलाचा मर्यादित वापर, एलपीजी गॅसची बचत आणि संपूर्ण कुटुंबाच्या आरोग्याचे संरक्षण याबाबत वैज्ञानिक व पुराव्यावर आधारित माहिती देणे हा होता. कार्यक्रमात आयएडीएमएनच्या संस्थापक संचालिका, वरिष्ठ आहारतज्ज्ञ आणि २० वर्षांहून अधिक अनुभव असलेल्या रुबी साऊंड यांनी प्रमुख मार्गदर्शन केले. त्यांनी जास्त प्रमाणात तेलाच्या वापरामुळे लठ्ठपणा, मधुमेह, उच्च रक्तदाब, हृदयविकार, फॅटी लिव्हर आणि पीसीओएससारख्या जीवनशैलीजन्य आजारांचा धोका वाढत असल्याचे सांगितले. तसेच कमी तेलातही चविष्ट, पौष्टिक आणि संतुलित आहार तयार करण्याच्या सोप्या पद्धती, स्वयंपाकात गॅसची बचत करण्याचे उपाय आणि प्रत्येक महिला आपल्या कुटुंबाच्या आरोग्याची पहिली आरोग्यदूत कशी बनू शकते, याविषयी सविस्तर मार्गदर्शन केले.
व्याख्यानादरम्यान रुबी साऊंड यांनी भारतीय वैद्यकीय संशोधन परिषद (ICMR) यांच्या शिफारशीनुसार प्रत्येक प्रौढ व्यक्तीसाठी दररोज सुमारे २० ते ३० मिली (४ ते ६ टीस्पून) तेल पुरेसे असल्याचे सांगितले. तेल बाटलीतून थेट न ओतता चमच्याने मोजून वापरणे, तळलेले पदार्थ मर्यादित प्रमाणात खाणे तसेच वाफवणे, उकडणे, भाजणे, ग्रिल करणे किंवा एअर फ्रायरचा मर्यादित वापर यांसारख्या आरोग्यदायी स्वयंपाक पद्धती स्वीकारण्याचे आवाहन त्यांनी केले. प्रेशर कुकरचा वापर, झाकण लावून स्वयंपाक करणे, डाळी व कडधान्ये आधी भिजवणे, उकळी आल्यानंतर गॅस मंद करणे आणि तेल पुन्हा-पुन्हा गरम करून वापरणे टाळणे या सवयींमुळे आरोग्यासोबतच एलपीजी गॅसचीही बचत होते, असे त्यांनी स्पष्ट केले. तसेच शेंगदाणा, मोहरी, तीळ, राईस ब्रॅन आणि सोयाबीन तेलाचा आळीपाळीने व योग्य प्रमाणात वापर करण्याचाही सल्ला दिला. कार्यक्रमाच्या शेवटी उपस्थित महिलांनी “मोजून तेल वापरू, तळलेले पदार्थ कमी करू, गॅसची बचत करू आणि आरोग्याचा संदेश प्रत्येक घरापर्यंत पोहोचवू” असा सामूहिक संकल्प केला. यावेळी जनजागृतीपर माहितीपत्रकांचे वितरण करण्यात आले. कार्यक्रमाला केंद्रीय कामगार, रोजगार, युवा व्यवहार व क्रीडा मंत्री डॉ. मनसुख मांडविया, भाजप मुंबई अध्यक्ष आमदार अमित साटम तसेच विविध मान्यवर आणि पदाधिकारी उपस्थित होते. भविष्यातही पुराव्यावर आधारित पोषण जनजागृती, आरोग्य शिक्षण आणि प्रतिबंधात्मक आरोग्यविषयक उपक्रम सातत्याने राबविण्यात येणार असल्याचे आयएडीएमएनतर्फे सांगण्यात आले.
