अमरावती : चोरीच्या विविध घटना नेहमीच समोर येत असतात. मात्र, यावेळी चोरट्याने थेट राज्य परिवहन महामंडळाची सुमारे दीड कोटी रुपये किमतीची विद्युतचलित ‘शिवाई’ बसच पळविल्याची धक्कादायक घटना उघडकीस आली आहे. पोलिसांनी तातडीने कारवाई करत बससह आरोपीला ताब्यात घेतले असून चौकशीदरम्यान त्याने दिलेल्या माहितीमुळे तपास यंत्रणाही चक्रावून गेली आहे. ही घटना १ जुलै रोजी मध्यरात्रीच्या सुमारास घडली. नागपूर येथील इमामवाडा बसस्थानकातील विद्युत भारण केंद्रावर एमएच-४९/बीझेड-८२५८ क्रमांकाची ‘शिवाई’ बस उभी असताना आरोपीने ती चोरून नेली. त्यानंतर राजापेठ पोलीस ठाण्याच्या हद्दीतील नंदा मार्केट परिसरात ही बस उभी असल्याची माहिती बीट मार्शल पथकाला मिळाली. तसेच बस चोरणारा संशयित गद्रे चौक परिसरात असल्याचीही माहिती पोलिसांना मिळाली. यानंतर बीट मार्शल आणि राजापेठ पोलीस ठाण्याच्या गुन्हे शोध पथकाने संयुक्त कारवाई करत बस आणि आरोपीला ताब्यात घेतले. चौकशीत आरोपीने आपले नाव विष्णू गणपती नीलावर (वय २३, रा. हईतनगर, जिल्हा रंगारेड्डी, तेलंगणा) असल्याचे सांगितले. त्याने १ जुलै रोजी पहाटेच्या सुमारास इमामवाडा बसस्थानकातून विद्युत भारणासाठी उभी असलेली बस चोरी केल्याची कबुली दिली.
चौकशीदरम्यान आरोपीने आणखी धक्कादायक खुलासा केला. त्याने तेलंगणा आणि आंध्र प्रदेशातून आतापर्यंत सुमारे वीस बसेस चोरी केल्याचा दावा केला असून नांदेड येथील बसस्थानकातूनही एक बस चोरल्याचे कबूल केले आहे. या प्रकरणांमध्ये विविध पोलीस ठाण्यांमध्ये त्याच्याविरोधात गुन्हे दाखल असल्याची माहिती तपासात समोर आली आहे. पोलिसांच्या माहितीनुसार, आरोपी चोरी केलेली बस एखाद्या निर्जन आणि सुरक्षित ठिकाणी नेऊन उभी करत असे. त्यानंतर बसमधील टायर, बॅटरी, ब्रेक डिस्क आणि इतर मौल्यवान सुटे भाग काढून त्यांची विक्री करत असे. आवश्यक साहित्य काढल्यानंतर बस त्याच ठिकाणी सोडून तो पसार होत असल्याची त्याची कार्यपद्धती असल्याचे तपासातून समोर आले आहे. मात्र, या वेळी पोलिसांच्या सतर्कतेमुळे चोरी उघडकीस आली आणि आरोपीला अटक करण्यात यश आले. सुमारे १ कोटी ५३ लाख रुपये किमतीच्या या विद्युतचलित बस चोरीप्रकरणी नागपूर येथील गणेशपेठ पोलीस ठाण्यात गुन्हा नोंदविण्यात आला असून आरोपीकडून आणखी काही गुन्ह्यांची उकल होण्याची शक्यता तपास यंत्रणांनी व्यक्त केली आहे.
