रायगड : रायगड जिल्ह्यातील मांडवा परिसरात सुरू असलेल्या बेकायदा डिझेल तस्करीचा मोठा पर्दाफाश करण्यात आला आहे. मांडवा सागरी पोलीस ठाण्याच्या हद्दीतील नवखारजवळील रेवस जेट्टी परिसरात दोन बोटींमधून अनधिकृतरीत्या डिझेलचा साठा करून त्याची वाहतूक केली जात असल्याची माहिती प्रशासनाला मिळाल्यानंतर पुरवठा विभाग आणि पोलिसांनी संयुक्त कारवाई केली. सोमवारी पहाटे टाकलेल्या छाप्यात मोठ्या प्रमाणात डिझेल, ड्रम, कॅन, पाईप तसेच इंधन साठवणूक आणि वाहतुकीसाठी वापरले जाणारे विविध साहित्य जप्त करण्यात आले. या कारवाईत सुमारे १४ लाख ५६ हजार रुपयांचा मुद्देमाल जप्त करण्यात आला असून, बेकायदा इंधन तस्करीविरोधातील ही महत्त्वाची कारवाई मानली जात आहे.
या प्रकरणी जिल्हा पुरवठा विभागाचे अधिकारी हर्षल देशमुख यांच्या फिर्यादीवरून संबंधित आरोपींविरुद्ध आवश्यक कायदेशीर कलमान्वये गुन्हा दाखल करण्यात आला आहे. कारवाईदरम्यान गजानन कोळी, अनिल कोळी आणि योगेश पाटील या तिघांना अटक करण्यात आली असून ते उरण तालुक्यातील रहिवासी असल्याची माहिती पोलिसांनी दिली. बेकायदेशीर डिझेल तस्करीचे हे जाळे किती मोठे आहे, त्यामागे आणखी कोणाचा सहभाग आहे का, तसेच अनधिकृतरीत्या मिळवलेल्या इंधनाचा या व्यवहारात वापर होत होता का, याचा सखोल तपास मांडवा सागरी पोलीस आणि संबंधित यंत्रणांकडून सुरू आहे. या कारवाईमुळे किनारपट्टी भागात सुरू असलेल्या अवैध इंधन तस्करीला मोठा आळा बसण्याची शक्यता व्यक्त केली जात आहे.
