वृत्तसंस्था : मेटाच्या मालकीच्या व्हॉट्सॲपने वापरकर्त्यांसाठी बहुप्रतिक्षित वापरकर्तानाव हे नवे वैशिष्ट्य उपलब्ध करण्यास सुरुवात केली आहे. या सुविधेमुळे आता समाजमाध्यमांप्रमाणेच प्रत्येक वापरकर्ता स्वतःचे स्वतंत्र वापरकर्तानाव निश्चित करू शकणार आहे. यापूर्वी कोणत्याही नवीन व्यक्तीशी संवाद साधण्यासाठी मोबाईल क्रमांक शेअर करणे आवश्यक होते. मात्र, या नव्या सुविधेमुळे मोबाईल क्रमांक न देता केवळ वापरकर्तानावाच्या माध्यमातूनही संवाद साधणे शक्य होणार आहे. कंपनीने २९ जून रोजी ही सुविधा उपलब्ध करून दिली असून सध्या वापरकर्त्यांना आपले पसंतीचे वापरकर्तानाव राखीव ठेवण्याची सुविधा देण्यात आली आहे. पुढील काही महिन्यांत हे वैशिष्ट्य सर्वांसाठी पूर्णपणे सुरू होईल. कंपनीच्या माहितीनुसार, एखाद्या व्यक्तीला प्रथमच संदेश पाठविताना मोबाईल क्रमांकाऐवजी वापरकर्तानाव दिसेल. त्यामुळे वैयक्तिक माहिती अधिक सुरक्षित राहण्यास मदत होणार असून गोपनीयतेचे संरक्षणही अधिक मजबूत होईल.
जगभरात व्हॉट्सॲपचे कोट्यवधी वापरकर्ते असल्याने एकाच प्रकारचे वापरकर्तानाव अनेकांना हवे असण्याची शक्यता लक्षात घेऊन कंपनीने आधी वापरकर्तानाव राखीव ठेवण्याची सुविधा दिली आहे. त्यामुळे पसंतीचे नाव मिळवण्यासाठी वापरकर्त्यांनी वेळेत नोंदणी करणे आवश्यक ठरणार आहे. या सुविधेत तीन ते पस्तीस अक्षरांपर्यंत वापरकर्तानाव निश्चित करता येणार आहे. तसेच प्रसिद्ध व्यक्ती, संस्था आणि नामांकित व्यक्तिमत्त्वांच्या नावांचा गैरवापर होऊ नये म्हणून कंपनीने अशी अनेक नावे आधीच राखीव ठेवली आहेत. या नव्या सुविधेमुळे मोबाईल क्रमांक उघड न करता सुरक्षितपणे संवाद साधणे अधिक सोपे होणार असून, गोपनीयतेला प्राधान्य देणाऱ्या वापरकर्त्यांसाठी हे वैशिष्ट्य महत्त्वाचे ठरणार आहे.
हे फिचर कसे वापरावे?
व्हॉट्सॲपच्या आगामी अपडेटमध्ये हे फिचर वापरण्यासाठी खालील स्टेप्स फॉलो कराव्या लागतील:
- व्हॉट्सॲप Settings मध्ये जा.
- तुमच्या Profile (प्रोफाइल फोटो) वर क्लिक करा.
- तिथे नाव आणि फोन नंबरसोबत ‘WhatsApp Username’ चा नवा पर्याय दिसेल.
- तिथे तुमचा युनिक युझरनेम सेट करा.
