ठाणे : शिळफाटा आणि खिडकाळी परिसरातील गोदामांना वारंवार लागणाऱ्या आगीच्या घटनांनंतर ठाणे महापालिकेने अनधिकृत गोदामांविरोधात मोठी कारवाई सुरू केली आहे. अलीकडे झालेल्या महापालिकेच्या महासभेत या भागातील बेकायदा गोदामे, अनधिकृत बांधकामे, अग्निसुरक्षा परवानगीचा अभाव आणि प्रशासनाच्या निष्क्रियतेवर नगरसेवकांनी तीव्र नाराजी व्यक्त केली होती. त्यानंतर महापालिकेने तातडीने निष्कासन मोहीम हाती घेत तीन दिवसांत तब्बल ११३ अनधिकृत गोदामे जमीनदोस्त केली आहेत. या कारवाईमागे परिसरातील वाढत्या आगीच्या घटना, नागरिकांच्या सुरक्षेचा प्रश्न आणि पर्यावरणावर होणारे गंभीर परिणाम ही प्रमुख कारणे असल्याचे प्रशासनाने स्पष्ट केले आहे. नगरसेवकांनी सभागृहात ग्रीन झोन, उद्यान आरक्षण तसेच शैक्षणिक आरक्षण असलेल्या जागांवर मोठ्या प्रमाणात अनधिकृत बांधकामे उभारण्यात आल्याचा मुद्दा उपस्थित केला. या बांधकामांमुळे पर्यावरणाचे मोठे नुकसान होत असून महापालिकेच्या महसुलालाही फटका बसत असल्याचे त्यांनी नमूद केले. याशिवाय अनेक गोदामांमध्ये साठवण्यात येणारी रसायने नैसर्गिक जलप्रवाहात सोडली जात असल्याने परिसरातील विहिरी आणि कूपनलिकांचे पाणी दूषित होत असून नागरिकांच्या आरोग्यालाही धोका निर्माण झाल्याची गंभीर बाब चर्चेत मांडण्यात आली. या पार्श्वभूमीवर दिवा प्रभाग समिती क्षेत्रात विशेष सर्वेक्षण आणि निष्कासन मोहीम सुरू करण्यात आली. शनिवारी सुरू झालेली ही मोहीम रविवारी सुट्टीच्या दिवशीही थांबविण्यात आली नाही आणि सोमवारीही अखंडपणे सुरू ठेवण्यात आली.
या मोहिमेच्या पहिल्या टप्प्यात रसायने, प्लास्टिक, ज्वलनशील पदार्थ तसेच भंगार साठवणूक करणाऱ्या गोदामांवर विशेष लक्ष केंद्रित करण्यात आले आहे. संभाव्य आगीचे धोके टाळण्यासाठी अशा गोदामांना प्राधान्य देत कारवाई केली जात आहे. शासकीय तसेच विविध आरक्षित भूखंडांवर उभारण्यात आलेल्या सुमारे ८५० अनधिकृत गोदामांचे सर्वेक्षण सुरू असून, नियमबाह्य आढळणाऱ्या सर्व गोदामांवर कठोर कारवाई करण्यात येणार असल्याची माहिती उपायुक्त दीपक झिंजाड यांनी दिली. ही मोहीम पुढेही सातत्याने सुरू राहणार असल्याचे त्यांनी स्पष्ट केले. दरम्यान, मनसेचे शिळ-देसाई विभागाध्यक्ष शरद पाटील यांनी कारवाईवर प्रश्नचिन्ह उपस्थित केले आहे. प्रशासक राजवटीच्या काळात सरकारी जागा, आरक्षित भूखंड आणि विविध मोकळ्या जागांवर मोठ्या प्रमाणात अनधिकृत गोदामे उभी राहिली असून, खान कंपाऊंड, आचार गल्ली, महापे रोड परिसर तसेच शिळ-दिवा मार्गालगत शेकडो बेकायदा गोदामे अद्याप अस्तित्वात असल्याचा दावा त्यांनी केला. मात्र, कारवाई केवळ निवडक ठिकाणांपुरती मर्यादित का ठेवली जात आहे, असा सवाल त्यांनी उपस्थित केला. तसेच संपूर्ण परिसरातील अनधिकृत गोदामांची यादी जाहीर करून कारवाईची माहिती पारदर्शकपणे जनतेसमोर मांडावी, अशी मागणीही त्यांनी केली. महापालिका आयुक्त सौरभ राव आणि अतिरिक्त आयुक्त प्रशांत रोडे यांच्या आदेशानुसार उपायुक्त जितेंद्र निकम, उपायुक्त दीपक झिंजाड, दिवा प्रभाग समितीचे सहाय्यक आयुक्त शिवप्रसाद नागरगोजे तसेच महापालिकेचे अधिकारी, कर्मचारी आणि पोलिस बंदोबस्ताच्या उपस्थितीत ही मोहीम सुरू असून, पुढील काळातही अशाच प्रकारची कठोर कारवाई सुरू राहणार असल्याचे प्रशासनाने स्पष्ट केले आहे.
