मुंबई : अन्न, नागरी पुरवठा व ग्राहक संरक्षण विभागाच्या राज्य दक्षता पथकाने धुळे जिल्ह्यात अवैध गॅस व डिझेल चोरी करणाऱ्या टोळीचा मोठा पर्दाफाश केला आहे. दोन दिवस गुप्त पाळत ठेवल्यानंतर गुजरात-धुळे महामार्गावर ही धडक कारवाई करण्यात आली. या कारवाईत भारत पेट्रोलियम कंपनीचा एलपीजी गॅस टँकर, एचपी कंपनीचा डिझेल टँकर, व्यावसायिक गॅस सिलिंडर तसेच इतर साहित्य असा एकूण ₹१ कोटी ५५ लाख ९५ हजार ११४ रुपयांचा मुद्देमाल जप्त करण्यात आला. या प्रकरणी ३ आरोपींना रंगेहात पकडण्यात आले असून त्यांच्याविरुद्ध पुढील कायदेशीर प्रक्रिया सुरू करण्यात आली आहे. साक्री तालुक्यातील दहिवल गावाजवळ, सुरत-धुळे महामार्गावरील अन्नपूर्णा ढाब्याच्या मागील परिसरात आणि पार्श्वनाथ ढाब्यालगत ही कारवाई करण्यात आली. राज्य दक्षता पथकाने गॅस आणि डिझेल टँकरमधून इंधनाची अवैध चोरी सुरू असतानाच छापा टाकत संपूर्ण रॅकेट उघडकीस आणले.
कारवाईदरम्यान गुजरातहून जळगावकडे जाणारा जीजे-०६ एझेड-४४३० क्रमांकाचा एलपीजी गॅस टँकर आणि त्यातील १७.४२ मेट्रिक टन एलपीजी गॅस जप्त करण्यात आला. तसेच जीजे-१२ बीझेड-७९९९ क्रमांकाचा डिझेल टँकर आणि त्यातील ३५ किलोलीटर डिझेलही ताब्यात घेण्यात आले. याशिवाय बोलेरो पिकअप, छोटा ट्रक, १३० व्यावसायिक गॅस सिलिंडर, गॅस भरण्याचे साहित्य, वजनकाटे आणि ड्रममध्ये साठवलेले डिझेलही जप्त करण्यात आले. राज्य दक्षता पथकातील दीपेंद्र परुळेकर, अमोल बुरटे, पवन कुंबले, रवींद्र राठोड, राजेश सोरते, राहुल इंगळे, देवानंद इंगळे आणि राजीव भेले यांनी ही कारवाई यशस्वीपणे पार पाडली. अवैध इंधन आणि गॅस चोरीविरोधातील अलीकडील काळातील ही एक मोठी कारवाई मानली जात असून, या प्रकरणामुळे अशा बेकायदेशीर कारवायांवर मोठा आळा बसण्याची अपेक्षा व्यक्त केली जात आहे.
