वृत्तसंस्था : तमिळनाडूचे मुख्यमंत्री आणि दाक्षिणात्य सिनेसृष्टीतील सुपरस्टार विजय यांना मिळालेल्या एका खास भेटवस्तूची सध्या सोशल मीडियावर जोरदार चर्चा सुरू आहे. भारताचा स्टार क्रिकेटपटू विराट कोहली याने विजय यांना स्वाक्षरी असलेली विशेष क्रिकेट बॅट भेट दिली आहे. मुख्यमंत्री विजय यांनी या बॅटसोबतचे काही फोटो सोशल मीडियावर शेअर केले असून ते इंटरनेटवर वेगाने व्हायरल होत आहेत. चाहत्यांकडूनही या खास भेटीवर मोठ्या प्रमाणात प्रतिक्रिया दिल्या जात आहेत.
शुक्रवारी MRF कंपनीच्या वरिष्ठ अधिकाऱ्यांच्या शिष्टमंडळाने तमिळनाडू सचिवालयात मुख्यमंत्री विजय यांची भेट घेतली. या बैठकीत MRF चे अध्यक्ष के. एम. मम्मेन, व्हाइस चेअरमन आणि व्यवस्थापकीय संचालक अरुण मम्मेन तसेच राहुल मम्मेन उपस्थित होते. राज्यातील सुमारे ५,३०० कोटी रुपयांच्या आगामी प्रकल्पांवर आणि गुंतवणुकीवर चर्चा करण्यासाठी ही बैठक आयोजित करण्यात आली होती. याच वेळी MRF टीमने विराट कोहलीची स्वाक्षरी असलेली ‘MRF Genius’ क्रिकेट बॅट मुख्यमंत्री विजय यांना सन्मानपूर्वक भेट दिली. विराट कोहली अनेक वर्षांपासून MRF चा ब्रँड अॅम्बेसेडर असल्याने ही भेट अधिक खास मानली जात आहे.
