रत्नागिरी : शहरात प्रतिबंधित गुटखा आणि पान मसाल्याच्या अवैध विक्रीला आळा घालण्यासाठी रत्नागिरी शहर पोलिसांनी पहाटे मोठी कारवाई करत सुमारे ६ लाख ८७ हजार रुपयांचा मुद्देमाल जप्त केला. गोपनीय माहितीच्या आधारे पोलिसांनी सापळा रचत संशयित वाहन अडवून तपासणी केली असता, त्यातून मोठ्या प्रमाणात गुटखा व पान मसाला आढळून आला. या कारवाईत शरद गणपती भंडारे (रा. सरूड, ता. शाहुवाडी, जि. कोल्हापूर) याला ताब्यात घेण्यात आले असून, ही कारवाई वरिष्ठ अधिकाऱ्यांच्या मार्गदर्शनाखाली पार पडली.
पोलीस निरीक्षक विवेक पाटील यांच्या नेतृत्वाखालील पथकाने ही कारवाई यशस्वी केली. जप्त करण्यात आलेल्या मुद्देमालात ३.२७ लाख रुपये किमतीचा गुटखा-पान मसाला आणि ३.६० लाख रुपये किमतीचे वाहन यांचा समावेश आहे. या प्रकरणी रत्नागिरी शहर पोलीस ठाण्यात गुन्हा दाखल करण्यात आला असून पुढील तपास पोलीस उपनिरीक्षक सागर शिंदे करत आहेत. या कारवाईमुळे शहरातील बेकायदा गुटखा विक्रीवर मोठा आळा बसण्याची शक्यता व्यक्त केली जात आहे.
