नागपूर : राज्य परिवहन सेवेचा दर्जा उंचावण्यासाठी नागपूर विभागात नव्याने दाखल झालेल्या ‘राजमाता जिजाऊ’ बससेवेचा शुभारंभ करण्यात आला. सदर येथील जिल्हा नियोजन भवनात आयोजित कार्यक्रमात महसूलमंत्री तथा पालकमंत्री चंद्रशेखर बावनकुळे यांच्या हस्ते सात बसेसना प्रातिनिधिक हिरवी झेंडी दाखवण्यात आली. नागपूर विभागात एकूण २४ नव्या बसेस दाखल झाल्या असून, प्रवाशांना सुरक्षित, सुलभ आणि विश्वासार्ह सेवा देण्यासाठी चालक व वाहकांनी अधिक जबाबदारीने काम करावे, असे आवाहन त्यांनी केले. तसेच, प्रत्येक बसथांब्यावर बस नियमित थांबणे आणि प्रवाशांशी सुसंवाद राखणे आवश्यक असल्याचेही त्यांनी स्पष्ट केले.
या वेळी बससेवेच्या विस्तारासाठी लोकप्रतिनिधींशी समन्वय साधण्याचे निर्देश देत, विशेषतः विद्यार्थी, ज्येष्ठ नागरिक आणि ग्रामीण भागातील प्रवाशांच्या गरजा लक्षात घेऊन नवीन मार्गांचे नियोजन करण्यावर भर देण्यात आला. उमरेड, काटोल, सावनेर आणि रामटेक या तालुक्यांमध्ये बससेवा अधिक प्रभावी करण्यासोबतच पारडसिंगा, धापेवाडा, कोराडी आणि कामठी येथील ड्रॅगन पॅलेससारख्या पर्यटनस्थळांपर्यंत सेवा मजबूत करण्याचेही निर्देश देण्यात आले. पर्यटनाला चालना देण्यासाठी स्वतंत्र सर्किट तयार करून वातानुकूलित बससेवा सुरू करण्याची गरजही व्यक्त करण्यात आली. कार्यक्रमास विविध लोकप्रतिनिधी आणि प्रशासकीय अधिकारी उपस्थित होते.
राजमाता जिजाऊ बसेसची मुख्य वैशिष्ट्ये :
- एका रांगेत ३+२ अशी आसन व्यवस्था
• एकूण सुमारे ५५ ते ५६ प्रवासी क्षमता
• ४ सीसीटीव्ही कॅमेरे (आतील व बाहेरील)
• पॅनिक बटन व जीपीएस ट्रॅकिंग प्रणाली
• इलेक्ट्रॉनिक डिस्प्ले व पीए प्रणाली
• इंटेलिजंट ट्रान्सपोर्ट सिस्टिम
• सुधारित आसन व्यवस्था व डिझाइन
• जास्त गर्दीच्या मार्गांवर चालविण्यासाठी खास तयार
