नागपूर : चुकीच्या दिशेने ट्रिपल सीट वाहन चालवताना आढळलेल्या अल्पवयीन वाहनचालक मुलाच्या पालकाला वाहतूक शाखेने ३० हजारांच्या दंडाचे चालान बजावले. वाहतूक शाखेने केलेल्या या कारवाईवर शिक्कामोर्तब करत मोटारवाहन न्यायालयाने वाहनाची नोंदणी १२ महिन्यांसाठी रद्द केली. सोबतच नियम आणि कायद्याचे उल्लंघन करत इतरांच्या जीवाला धोका निर्माण करणाऱ्या अल्पवयीन मुलाला वयाच्या २५ वर्षांपर्यंत वाहन परवाना न देण्याचे आदेश दिले.
विनोद काकडे आणि जयन राजेश वासनिक असे न्यायालयाने दंडात्मक कारवाई केलेल्या अल्पवयीन वाहनचालकाचे वडील आणि अन्य एका नातेवाईकाचे नाव आहे. काकडेंच्या मुलाला वाहतूक शाखेच्या लकडगंज परिमंडळाने चुकीच्या दिशेने ट्रिपलसीट वाहन चालवताना गंगाबाई घाटाजवळ अडवले होते. या मुलाने नातेवाईक असलेल्या वासनिककडून काही काळासाठी दुचाकी वाहन मागून घेतले. त्यानंतर तो दोन मित्रांना पाठीमागे बसवून चुकीच्या दिशेने भरधाव वेगात वाहन चालवत गंगाबाई घाटाकडून जात होता. त्याच वेळी कर्तव्यावर असलेले पोलिस निरीक्षक संजय खंदाडे, महिला पोलीस हवालदार कीर्ती वरखेडे आणि मृणाल या दोघींनी त्याला अडवले. मुलाकडे वाहन परवाना नसल्याने वाहतूक शाखेने वाहन मालकाला घटनास्थळी बोलावून घेतले. तो अल्पवयीन असल्याचे आढळल्याने वाहतूक शाखेच्या महिला अंमलदारांनी दंडात्मक कारवाईचे चलान दिले. न्यायालयाने त्यावर शिक्कामोर्तब करत वाहन मालक आणि अल्पवयीन मुलाच्या वडिलांना एकूण ३० हजारांच्या दंडाशी शिक्षा सुनावली. सोबतच वाहनाची नोंदणी १२ महिन्यांसाठी रद्द करत अल्पवयीन मुलाला वयाच्या २५ वर्षांपर्यंत वाहन परवाना न देण्याचे आदेश दिले.
