पुणे : राज्यात गांजा तस्करीचे प्रमाण मोठ्या प्रमाणात वाढले आहे. राज्यातील वेगवेगळ्या भागातून गांजा विक्रीच्या घटना उघडकीस येत असतात. अशातचं आता शिक्रापूर (ता. शिरुर) पोलीस स्टेशन हद्दीमध्ये गांजाची वाहतूक करणाऱ्या दोन स्कॉर्पिओ जप्त करण्यात शिक्रापूर पोलिसांना यश आले असून, शिक्रापूर पोलिसांच्या या धडाकेबाज कामगिरीमध्ये पोलिसांनी ५३ किलो गांजा तब्यात घेतला आहे. या कारवाईत पोलिसांनी वैष्णव वैजनाथ ढाकणे (वय २३ वर्षे, रा. हासनपूर, ता. शेवगाव, जि. अहिल्यानगर ), स्वप्नील गोरक्षनाथ खेडकर (वय २२), हर्षद देविदास खेडकर (वय २०, दोघे रा. एकनाथवाडी, ता. पाथर्डी, जि. अहिल्यानगर ), शुभम बंडू जवरे (वय २१) आणि तुषार रामनाथ जवरे (वय २१, दोघे रा. वाडगाव, ता. शेवगाव, जि. अहिल्यानगर ), अक्षय कांतीलाल आव्हाड (वय २६ वर्षे, रा. करमाळा रोड, राशीन, ता. कर्जत, जि. अहिल्यानगर) यांना अटक केली आहे.
शिक्रापूर (ता. शिरुर) पोलीस स्टेशन हद्दीमध्ये पुणे- नगर महामार्गावरून दोन पांढऱ्या रंगाच्या स्कॉर्पिओमधून काही युवक गांजा घेऊन जाणार असल्याची माहिती पोलीस हवालदार मिलिंद देवरे यांना मिळाली, त्यांनतर पोलीस निरीक्षक दिपरतन गायकवाड यांच्या मार्गदर्शनाखाली शिक्रापूर पुणे नगर रस्त्यावर सापळा लावला असता त्यांना दोन पांढऱ्या रंगाच्या स्कॉर्पिओ आल्याचे दिसून आले, यावेळी पोलिसांनी दोन्ही स्कॉर्पिओमध्ये तपासणी केली असता त्यामध्ये गांजा असल्याचे दिसून आले. दरम्यान पोलिसांच्या पथकाने दोन्ही स्कॉर्पिओसह त्यामध्ये असलेला तब्बल ५३ किलो गांजा जप्त करत गांजा वाहतूक करणाऱ्या युवकांना ताब्यात घेतले आहे. गांजा वाहतूक करणाऱ्यांविरुद्ध गुन्हा दाखल केला असून पुढील तपास पोलीस करत आहे.
