पुणे : नवरात्रोत्सवानिमित्त पुणे महानगर परिवहन महामंडळ लिमिटेड (PMPML) कडून भाविकांसाठी विशेष पर्यटन बससेवा सुरू करण्यात आली आहे. नवरात्रीच्या काळात देवींच्या शक्तिस्थळांना भेट देणाऱ्या भाविकांची संख्या मोठ्या प्रमाणात वाढत असल्याने, त्यांना सोयीस्कर आणि परवडणाऱ्या दरात प्रवास सुविधा उपलब्ध करून देण्यासाठी ही विशेष व्यवस्था करण्यात आली आहे. या बससेवेच्या माध्यमातून पुणे शहर आणि परिसरातील विविध देवी मंदिरांना एकाच प्रवासात भेट देण्याची संधी भाविकांना मिळणार आहे. शनिवार, रविवार, सार्वजनिक सुट्टीचे दिवस तसेच इतर दिवशीही पर्यटक आणि भाविकांच्या मागणीनुसार ही बससेवा उपलब्ध करून दिली जाणार आहे. ‘पुणे दर्शन’ बससेवेच्या धर्तीवर ही सुविधा वातानुकूलित स्मार्ट इलेक्ट्रिक बसमधून दिली जाणार असल्याची माहिती PMPML प्रशासनाने दिली आहे. त्यामुळे भाविकांना आरामदायी, सुरक्षित आणि पर्यावरणपूरक प्रवासाचा अनुभव घेता येणार आहे. नवरात्र काळात धार्मिक पर्यटनाला चालना देण्याच्या उद्देशाने PMPMLने ही विशेष सेवा उपलब्ध करून दिली आहे.
या विशेष पर्यटन बससेवेमध्ये दोन वेगवेगळे मार्ग निश्चित करण्यात आले आहेत. पर्यटन बससेवा क्रमांक १३ (१) अंतर्गत पुणे स्टेशन, स्वारगेट, तळजाई माता मंदिर, पर्वती मंदिर, तुकाई माता मंदिर (कात्रज), श्रीनाथ म्हस्कोबा जोगेश्वरी माता मंदिर आणि यमाई माता मंदिर या धार्मिक स्थळांचा समावेश आहे. ही बस पुणे स्टेशन येथून सकाळी ८.३० वाजता रवाना होईल आणि विविध मंदिरांचे दर्शन घडवून सायंकाळी ७ वाजता पुन्हा पुणे स्टेशन येथे परत येईल. तर पर्यटन बससेवा क्रमांक १३ (२) अंतर्गत महालक्ष्मी मंदिर, तांबडी जोगेश्वरी मंदिर, चतुःशृंगी माता मंदिर, वैष्णवी माता मंदिर आणि भवानी माता मंदिर या ठिकाणांचा समावेश करण्यात आला आहे. या मार्गावरील बसदेखील सकाळी ८.३० वाजता सुरू होऊन सायंकाळी ७ वाजता पुणे स्टेशन येथे पोहोचणार आहे. दोन्ही बससेवांसाठी प्रतिप्रवासी ५०० रुपये तिकीट आकारण्यात येणार आहे. या पर्यटन बससेवेसाठी आरक्षण किंवा तिकीट बुकिंग डेक्कन जिमखाना, पुणे स्टेशन, स्वारगेट, कात्रज, हडपसर गाडीतळ, पुणे महापालिका भवन, भोसरी बसस्थानक आणि निगडी येथील पास केंद्रांवर करता येणार आहे. बससेवेबाबत अधिक माहितीसाठी PMPMLचे समन्वयक सेवक नितीन गुरव (९८५०५०१८६२) यांच्याशी संपर्क साधण्याचे आवाहन करण्यात आले आहे. भाविक आणि प्रवाशांनी या विशेष सेवेचा जास्तीत जास्त लाभ घ्यावा, असे आवाहन PMPMLकडून करण्यात आले आहे.
