नवी दिल्ली : राष्ट्रीय महामार्गांवरून नियमित प्रवास करणाऱ्या तसेच टोल प्लाझाच्या आसपास राहणाऱ्या वाहनचालकांसाठी भारतीय राष्ट्रीय महामार्ग प्राधिकरणाने (NHAI) मोठा निर्णय घेतला आहे. NHAI ने आपल्या ‘डिजिटल लोकल पास’ सुविधेचा विस्तार देशभरातील १२१ टोल प्लाझांवर केला आहे. या सुविधेमुळे टोल नाक्याच्या जवळ राहणाऱ्या स्थानिक नागरिकांना दररोज टोल भरण्याचा आर्थिक भार कमी होणार आहे. आता पात्र वाहनचालकांना केवळ ३५० रुपयांमध्ये एका महिन्यासाठी अमर्याद लोकल पास मिळणार आहे. या सुविधेचा लाभ संबंधित टोल प्लाझाच्या २० किलोमीटरच्या परिसरात राहणाऱ्या नागरिकांना घेता येणार आहे. मात्र, हा पास केवळ वैयक्तिक आणि अव्यावसायिक वाहनांसाठी लागू राहणार असून व्यावसायिक वाहनांना या सवलतीचा लाभ मिळणार नाही.
यापूर्वी लोकल पास मिळवण्यासाठी वाहनचालकांना टोल प्लाझावर प्रत्यक्ष जाऊन अर्ज करावा लागत होता. त्यासाठी विविध कागदपत्रे जमा करण्याची प्रक्रिया करावी लागत असल्याने नागरिकांना अनेक अडचणींचा सामना करावा लागत होता. आता NHAI ने ही संपूर्ण प्रक्रिया डिजिटल केली आहे. पात्र वाहनधारकांना ‘राजमार्ग यात्रा’ ॲपच्या माध्यमातून घरबसल्या लोकल पाससाठी अर्ज करता येणार आहे. अर्ज करताना पत्त्याची पडताळणी डिजीलॉकरच्या माध्यमातून, वाहनाची माहिती ‘वाहन डेटाबेस’द्वारे आणि संबंधित फास्टॅगची माहिती ऑनलाइन पद्धतीने तपासली जाणार आहे. त्यामुळे कागदपत्रे जमा करण्यासाठी टोल कार्यालयात जाण्याची गरज राहणार नाही. राष्ट्रीय महामार्ग वापर शुल्क नियमांनुसार या डिजिटल लोकल पाससाठी दरमहा ३५० रुपये शुल्क निश्चित करण्यात आले आहे. फास्टॅगशी जोडलेल्या या सुविधेमुळे टोल प्लाझावर वाहनांना थांबण्याची गरज कमी होणार असून प्रवास अधिक वेगवान आणि सुलभ होणार आहे. स्थानिक नागरिकांना वारंवार टोल भरावा लागू नये, तसेच त्यांचा वेळ आणि पैसा वाचावा, या उद्देशाने ही सुविधा सुरू करण्यात आली आहे.
