मुंबई : भांडुप रेल्वे स्थानकाबाहेर सोमवारी रात्री अचानक वेग वाढल्याने बेस्ट बसने १० ते १२ पादचाऱ्यांना धडक दिली. या अपघातात चौघांचा मृत्यू झाला, तर १३ जण जखमी झाले. या प्रकरणी भांडुप पोलिसांनी गुन्हा दाखल करून बेस्ट बसचालक संतोष सावंत (५२) याला अटक केली. जखमींवर रुग्णालयात उपचार सुरू आहेत.
भांडुप पश्चिम रेल्वे स्थानक परिसरात सोमवारी रात्री ९.४५ च्या सुमारास हा अपघात झाला. बेस्ट बसचालक संतोष सावंत बस वळवत असताना अचानक त्याचा पाय ब्रेकऐवजी एक्सलेटरवर पडला. त्यानंतर बसने वेग घेतला. याच वेळी अनेक पादचारी पदपथावर बसच्या रांगेत उभे होते. रांगेत उभ्या असलेल्या १० ते १२ जणांना बसने धडक दिली. या अपघातात १० ते १२ जण गंभीर जखमी झाले. अपघातानंतर परिसरात एकच गोंधळ उडाला. अपघाताची माहिती मिळताच भांडुप पोलीस आणि अग्निशमन दलाच्या जवानांना तत्काळ घटनास्थळी धाव घेतली आणि जखमींना मुलुंडमधील अगरवाल रुग्णालयात दाखल केले. मात्र प्रकृती गंभीर असल्याने सर्व जखमींना तत्काळ घाटकोपरमधील राजावाडी रुग्णालयात दाखल करण्यात आले.
