वृत्तसंस्था : महिला विश्वचषकातील भारत आणि पाकिस्तान यांच्यातील बहुप्रतीक्षित सामन्यात भारतीय संघाने शानदार कामगिरी करत ६४ धावांनी दणदणीत विजय मिळवला. प्रथम फलंदाजी करताना भारताने निर्धारित २० षटकांत ६ बाद १७० धावांचा मजबूत डोंगर उभारला. या आव्हानाचा पाठलाग करताना पाकिस्तानचा संपूर्ण संघ १०६ धावांवर गारद झाला. या विजयात स्मृती मानधनाच्या दमदार अर्धशतकी खेळीबरोबरच दीप्ती शर्माच्या अष्टपैलू कामगिरीचा मोठा वाटा राहिला. भारताची सुरुवात आक्रमक झाली असली तरी सलामीवीर शफाली वर्मा लवकर बाद झाली. त्यानंतर जेमिमाह रॉड्रिग्सही स्वस्तात माघारी परतल्याने भारतीय संघ अडचणीत सापडला होता. मात्र स्मृती मानधना आणि कर्णधार हरमनप्रीत कौर यांनी तिसऱ्या विकेटसाठी ९१ धावांची महत्त्वपूर्ण भागीदारी करत डाव सावरला. स्मृतीने ४४ चेंडूत ६८ धावांची शानदार खेळी केली. तिच्या खेळीत ९ चौकार आणि २ षटकारांचा समावेश होता. हरमनप्रीतनेही ३६ धावांचे योगदान दिले. अखेरच्या षटकांमध्ये रिचा घोषने १७ चेंडूत ३४ धावांची तुफानी खेळी करत भारताला १७० धावांपर्यंत पोहोचवले.
१७१ धावांच्या लक्ष्याचा पाठलाग करताना पाकिस्तानने सावध सुरुवात केली आणि गुल फिरोजा व मुनीबा अली यांनी पहिल्या विकेटसाठी ३८ धावांची भागीदारी केली. मात्र दीप्ती शर्माने फिरोजाला बाद करत भारताला पहिले यश मिळवून दिले. त्यानंतर आयशा जफरलाही तिने माघारी धाडले. पाकिस्तानकडून मुनीबा अलीने सर्वाधिक ४१ धावा करत झुंज देण्याचा प्रयत्न केला, मात्र तिला दीप्ती शर्माने धावबाद करत पाकिस्तानच्या आशा संपुष्टात आणल्या. त्यानंतर पाकिस्तानचा डाव पूर्णपणे कोलमडला. दीप्ती शर्माने पाच बळी घेतले आणि एका धावबादमध्येही मोलाची भूमिका बजावत सामन्याची दिशा बदलली. श्री चरणीने तीन विकेट घेत भारतीय गोलंदाजीला भक्कम साथ दिली, तर शफाली वर्मानेही एक विकेट मिळवली. या शानदार विजयामुळे भारताने गट अ मध्ये दुसरे स्थान पटकावले असून अव्वल स्थानी ऑस्ट्रेलियाचा संघ कायम आहे. भारतीय संघाचा पुढील सामना १७ जून रोजी नेदरलँड्सविरुद्ध होणार असून या विजयामुळे संघाचा आत्मविश्वास निश्चितच उंचावला आहे.
भारतीय महिला (प्लेइंग ११): स्मृती मानधना, शफाली वर्मा, जेमिमाह रॉड्रिग्स, हरमनप्रीत कौर (C), भारती फुलमाली, रिचा घोष (WK), दीप्ती शर्मा, अरुंधती रेड्डी, श्रेयंका पाटील, श्री चरणी, क्रांती गौड
पाकिस्तान महिला (प्लेइंग ११): गुल फिरोजा, मुनीबा अली (WK), आयशा जफर, सायरा जबीन, आलिया रियाझ, नतालिया परवेझ, फातिमा सना (C), रमीन शमीम, नशरा संधू, तस्मिया रुबाब, सादिया इक्बाल
