मुंबई/ठाणे : राज्यात गेल्या तीन दिवसांपासून सुरू असलेल्या मुसळधार पावसामुळे जनजीवन विस्कळीत झाले असून पुढील दोन दिवसही मुंबई, कोकण आणि घाटमाथा परिसरात अतिमुसळधार पावसाचा इशारा कायम आहे. भारतीय हवामान विभागाने ४ ते ६ जुलै या कालावधीत मुंबई, रायगड, ठाणे, पालघर, रत्नागिरी आणि सिंधुदुर्ग जिल्ह्यांमध्ये मुसळधार ते अतिमुसळधार पावसाचा अंदाज वर्तवला आहे. या पार्श्वभूमीवर मुंबई प्रादेशिक हवामान केंद्राने मुंबई आणि ठाणे जिल्ह्यासाठी ४ व ५ जुलै रोजी लाल इशारा जारी केला असून अतिवृष्टी, विजांचा कडकडाट, सखल भागांत पाणी साचणे, पूरस्थिती आणि वाहतुकीवर परिणाम होण्याची शक्यता व्यक्त केली आहे. या इशाऱ्याच्या पार्श्वभूमीवर कल्याण-डोंबिवली महानगरपालिका क्षेत्रातील सर्व प्राथमिक, माध्यमिक, उच्च माध्यमिक शाळा तसेच महाविद्यालयांना शनिवार, ४ जुलै रोजी सुट्टी जाहीर करण्यात आली आहे. हा निर्णय राज्य मंडळासह केंद्रीय माध्यमिक शिक्षण मंडळ, भारतीय शालेय प्रमाणपत्र परीक्षा मंडळ आणि केंब्रिज अभ्यासक्रमाच्या सर्व शैक्षणिक संस्थांना लागू करण्यात आला आहे. पालघर जिल्ह्यातही पुढील दोन दिवस मुसळधार पावसाचा अंदाज लक्षात घेऊन जिल्हा प्रशासनाने शाळा, महाविद्यालये आणि अंगणवाड्यांना सुट्टी जाहीर केली आहे. तसेच अत्यावश्यक कामाशिवाय नागरिकांनी घराबाहेर पडू नये, नद्या, ओढे आणि समुद्रकिनाऱ्यांपासून दूर राहावे, असे आवाहन प्रशासनाने केले आहे.
मुंबईसह राज्यातील अनेक भागांत प्रशासनाने सतर्कतेचा इशारा देत नागरिकांना आवश्यक ती खबरदारी घेण्याचे आवाहन केले आहे. सातारा, पुणे आणि नाशिक जिल्ह्यांच्या घाटमाथ्यावरही मुसळधार पावसाचा अंदाज व्यक्त करण्यात आला असून संभाव्य पूरस्थिती, भूस्खलन, वाहतूक विस्कळीत होणे आणि स्थानिक पातळीवर नुकसान होण्याची शक्यता नाकारता येत नसल्याचे प्रशासनाने म्हटले आहे. सखल भागातील नागरिकांनी विशेष दक्षता घ्यावी, घाट रस्त्यांवरील अनावश्यक प्रवास टाळावा आणि कोणतीही आपत्कालीन परिस्थिती उद्भवल्यास तातडीने स्थानिक प्रशासन किंवा आपत्ती व्यवस्थापन यंत्रणेशी संपर्क साधावा, असे आवाहन करण्यात आले आहे. नागरिकांच्या मदतीसाठी विविध नियंत्रण कक्ष आणि मदत दूरध्वनी क्रमांक कार्यान्वित ठेवण्यात आले आहेत. बृहन्मुंबई महानगरपालिकेचा मदत क्रमांक १९१६, पालघर जिल्हा नियंत्रण कक्षाचे ०२५२५-२९७४७४ आणि ८२३७९७८८७३, ठाणे महानगरपालिकेचे ०२२-२५३६४७७९, ०२२-२५३०१७४० आणि ९३७२३३८८२७, तर ठाणे आपत्ती व्यवस्थापन कक्षाचे १८००-२२२-१०८ आणि ८६५७८८७१०१ हे क्रमांक नागरिकांसाठी उपलब्ध आहेत. पनवेल महानगरपालिकेनेही ०२२-२७४५८०४०, ०२२-२७४५८०४१ आणि ०२२-२७४५८०४२ हे मदत क्रमांक सुरू ठेवले आहेत. सलग चार दिवसांच्या मुसळधार पावसानंतर शुक्रवारी मुंबईत काही काळ पावसाने विश्रांती घेतल्याने रस्ते वाहतूक सुरळीत राहिली, तर उपनगरीय रेल्वे सेवा पाच ते दहा मिनिटे उशिराने धावत होती. मात्र, हवामान विभागाने लाल इशारा कायम ठेवला असून पुढील काही तासांत पुन्हा पावसाचा जोर वाढण्याची शक्यता व्यक्त केली आहे. त्यामुळे नागरिकांनी प्रशासनाच्या सूचनांचे काटेकोर पालन करून सुरक्षिततेला प्राधान्य द्यावे, असे आवाहन करण्यात आले आहे.
