मुंबई : गेल्या काही दिवसांत मुंबईला पाणीपुरवठा करणाऱ्या सात धरणक्षेत्रात चांगला पाऊस झाल्याने या धरणांत १५ जुलैपर्यंत ३५ टक्क्यांहून अधिक पाणीसाठा आहे. गेल्या वर्षी याच तारखेला हा साठा ३१ टक्के होता. यंदाचा पाणीसाठा त्याहून अधिक असून, तो मुंबईकरांना जवळपास १२७ दिवस पुरेल. मुंबईला अप्पर वैतरणा, मोडक सागर, तानसा, मध्य वैतरणा, भातसा, विहार, तुळशी या सात धरणांची पाणीसाठवण क्षमता १४ लाख ४७ हजार ३६३ दशलक्ष लिटर आहे. मुंबईला दररोज ३ हजार ८५० दशलक्ष लिटर पाणीपुरवठा होतो. मात्र, पावसाने पाठ फिरवल्याने मुंबई महापालिकेने आधी पाच टक्के आणि त्यानंतर दहा टक्के पाणी कपात लागू केली. त्यानंतर मुंबईतील अनेक भागांत पाणीटंचाई जाणवू लागली. मात्र गेल्या काही दिवसांत धरणक्षेत्रात पडत असलेल्या पावसामुळे पाणीसाठ्यात वाढ झाली असल्याने जलचिंता मिटली आहे.
मुंबईला पाणीपुरवठा करणाऱ्या सातही धरणांत १५ जुलैपर्यंत ३५.११ टक्के पाणीसाठ्याची नोंद झाली. हा साठा पाच लाख ८ हजार १०८ दशलक्ष लिटर इतका आहे. गेल्या वर्षी हाच साठा ३१.१६ टक्के म्हणजेच चार लाख ५० हजार ९६५ दशलक्ष लिटर होता. या धरणांमध्ये ८ जुलैला १८.७३ टक्के पाणीसाठा होता. त्यात आता जवळपास दुप्पट वाढ झाली आहे. गेल्या २४ तासांत मोडक सागर धरणक्षेत्रात ९९ मिमी, तानसा धरणक्षेत्रात ९३ मिमी आणि मध्य वैतरणा धरणक्षेत्रात १२० मिमी पाऊस झाला. भातसा धरणाची पाणीसाठवण क्षमता ७ लाख १७ हजार ३७ दशलक्ष लिटर आहे. आता या धरणात ३३.३३ टक्के म्हणजे २ लाख ३८ हजार ९५९ दशलक्ष लिटर पाणीसाठा आहे. अप्पर वैतरणा धरणातील पाणीसाठाही सहा टक्के म्हणजे १२ हजार ८९९ दशलक्ष लिटर झाला आहे. या धरणाची पाणीसाठवण क्षमता दोन लाख २७ हजार ४७ दशलक्ष लिटर आहे.
धरणांतील पाणीसाठा
मोडक सागर-५५.२३ टक्के
तानसा- ७०.७३ टक्के
मध्य वैतरणा-३१.५५ टक्के
विहार- ५३.९९ टक्के
तुळशी- ७९.७० टक्के
