मुंबई : सणासुदीच्या पार्श्वभूमीवर नागरिकांच्या आरोग्याशी तडजोड करणाऱ्या आणि अन्न सुरक्षा नियमांचे उल्लंघन करणाऱ्या खाद्य आस्थापनांविरोधात अन्न व औषध प्रशासनाने (एफडीए) राज्यभर विशेष मोहीम हाती घेतली आहे. या मोहिमेअंतर्गत मुंबई सेंट्रल येथील नायर रुग्णालयाच्या कॅन्टीनवर मोठी कारवाई करण्यात आली असून, अस्वच्छता आणि अन्न सुरक्षा नियमांचे गंभीर उल्लंघन आढळल्याने कॅन्टीनचा परवाना तत्काळ निलंबित करण्यात आला आहे. १६ सप्टेंबर रोजी एफडीएच्या विशेष पथकाने अचानक तपासणी केली असता स्वच्छतेतील गंभीर त्रुटी निदर्शनास आल्या. रुग्ण, त्यांचे नातेवाईक आणि नागरिकांच्या आरोग्याला धोका निर्माण होऊ नये, या उद्देशाने प्रशासनाने तातडीने कारवाई करत कॅन्टीनचा परवाना निलंबित केला असून पुढील कायदेशीर प्रक्रिया सुरू करण्यात आली आहे. सणासुदीच्या काळात सुरक्षित आणि दर्जेदार अन्नपदार्थ नागरिकांना उपलब्ध व्हावेत, यासाठी एफडीएने राज्यभर तपासणी मोहीम अधिक तीव्र केली आहे.
या विशेष मोहिमेदरम्यान मुंबईतील एकूण ७ हॉटेल, रेस्टॉरंट आणि खाद्य आस्थापनांचे परवाने निलंबित करण्यात आले आहेत. राज्यभरात २७ खाद्य आस्थापनांची तपासणी करण्यात आली असून त्यापैकी १४ आस्थापनांचे परवाने निलंबित, तर १३ आस्थापनांना सुधारणा नोटीस बजावण्यात आली आहे. याशिवाय, अन्नभेसळ रोखण्यासाठी राबविण्यात आलेल्या कारवाईत राज्यभरातून २,८१३ लिटर दूध व दुग्धजन्य पदार्थांचा सुमारे ₹७.३८ लाखांचा साठा जप्त करण्यात आला. तसेच नागपूर विभागात बंदी असलेला गुटखा, पानमसाला आणि सुगंधित तंबाखूचा ₹१२.१० लाखांचा साठा जप्त करण्यात आला असून या कारवाईदरम्यान २ वाहने जप्त, ३ जणांना अटक करण्यात आली आहे. संबंधितांविरोधात पोलीस ठाण्यात गुन्हे दाखल करण्यात आले असून सणासुदीच्या काळात नागरिकांच्या आरोग्याशी खेळ करणाऱ्यांविरोधात अशाच प्रकारची कठोर कारवाई सुरू राहणार असल्याचा इशारा एफडीएने दिला आहे.
