मुंबई : केंद्रीय निवडणूक आयोगाने (ECI) महाराष्ट्रातील विशेष सखोल पुनरीक्षण (SIR-2026) प्रक्रियेला महत्त्वाची मुदतवाढ दिली आहे. महाराष्ट्राच्या मुख्य निवडणूक अधिकाऱ्यांच्या विनंतीनुसार आयोगाने दावे आणि हरकती दाखल करण्याची अंतिम मुदत ३० सप्टेंबर २०२६ वरून १२ ऑक्टोबर २०२६ पर्यंत वाढवली आहे. त्यामुळे मतदारांना मतदार यादीतील नाव, पत्ता, तपशील दुरुस्ती किंवा नवीन नाव समाविष्ट करण्यासाठी अधिक वेळ उपलब्ध होणार आहे. निवडणूक आयोगाने जारी केलेल्या सुधारित वेळापत्रकानुसार दावे व हरकतींचा निपटारा १० नोव्हेंबर २०२६ पर्यंत करण्यात येईल, तर अंतिम मतदार यादी १६ नोव्हेंबर २०२६ रोजी प्रसिद्ध केली जाणार आहे.
आयोगाच्या या निर्णयामुळे मतदारांना आवश्यक कागदपत्रे सादर करण्यासाठी अतिरिक्त वेळ मिळणार असून, पुनरीक्षण प्रक्रिया अधिक प्रभावी आणि सर्वसमावेशक होण्याची अपेक्षा व्यक्त केली जात आहे. आयोगाने या प्रक्रियेत मतदारांना मोठा दिलासा देणारे दोन महत्त्वाचे निर्णयही घेतले आहेत. मतदारांच्या नावात तफावत (Logical Discrepancies) किंवा ‘अनमॅप्ड’ नोंदी आढळल्यास संबंधित बूथ लेव्हल अधिकारी (BLO) थेट मतदारांच्या घरी जाऊन आवश्यक कागदपत्रे स्वीकारणार आहेत. त्यामुळे नागरिकांना कार्यालयात वारंवार फेऱ्या मारण्याची गरज भासणार नाही. तसेच अशा प्रकरणांमध्ये प्रत्यक्ष सुनावणीसाठी निवडणूक कार्यालयात हजर राहणेही बंधनकारक राहणार नाही. केवळ अपवादात्मक परिस्थितीतच सुनावणी घेतली जाईल, असे आयोगाने स्पष्ट केले आहे. नागरिकांना घरबसल्या Voter Services Portal किंवा Voter Helpline App च्या माध्यमातून फॉर्म ६, ७ आणि ८ ऑनलाइन भरून दावे व हरकती सादर करण्याची सुविधाही उपलब्ध आहे. आयोगाच्या या निर्णयामुळे मतदार नोंदणी प्रक्रिया अधिक सुलभ, पारदर्शक आणि नागरिकाभिमुख होण्यास मदत होणार असल्याचे मानले जात आहे.
