मुंबई : मिरा-भाईंदर, वसई-विरार पोलिसांच्या अमली पदार्थविरोधी पथकाने आयुक्तालयाच्या हद्दीत गेल्या अकरा महिन्यांच्या कालावधीत तब्बल साडेपाच कोटींहून अधिक किमतीचा अमली पदार्थांचा साठा जप्त केला आहे. याप्रकरणी ४३ गुन्हे दाखल करून पोलिसांनी ५३ आरोपींना अटक केली आहे. जप्त करण्यात आलेल्या साठ्यात प्रामुख्याने मेफेड्रॉन (एमडी), गांजा, हेरॉईन, चरस, कफसिरप, अलप्राझोलॅम गोळ्या, ट्रामाडोल कॅप्सुल्स आदींचा समावेश आहे. मिरा-भाईंदर, वसई-विरार पोलिस आयुक्तालयाच्या हद्दीत अमली पदार्थांची विक्री होऊ नये यासाठी संबंधित विभागांनी सतर्क राहण्याच्या सूचना पोलिस आयुक्त मधुकर पांडे यांनी दिल्या आहेत. अमली पदार्थविरोधी पथकासह स्थानिक पोलिसांकडून आयुक्तालयाच्या हद्दीत अमली पदार्थांचे सेवन करणाऱ्या तसेच त्यांची विक्री करणाऱ्यांवर कारवाई केली जाते. सन २०२१ या वर्षात अमली पदार्थ विक्री करणाऱ्या १०५ जणांवर तर त्याचे सेवन करणाऱ्या ४०८ जनांवर कारवाई करण्यात आली होती. तर गेल्या वर्षी (२०२२) अमली पदार्थ विक्री करणाऱ्या ११७ तर त्याचे सेवन करणाऱ्या ५४८ जणांवर कारवाई करण्यात आली होती. अमली पदार्थ विक्री व सेवन याला आळा घालण्यासाठी काही दिवसांपूर्वीच मिरा-भाईंदर पोलिस आयुक्तालयाच्या जिल्हास्तरीय अमली पदार्थविरोधी कार्यकारी समितीची ऑनलाईन बैठक घेण्यात आली. त्यात अन्न व औषध प्रशासन, सीमा शुल्क विभाग, राज्य उत्पादन शुल्क, आरोग्य विभाग आदी विभागही सहभागी झाले होते.
सध्याच्या काळात अमली पदार्थांच्या सेवनाकरिता अलप्राझोलॅम गोळ्या व ट्रामाडोल कॅप्सूल्स यांचा मोठ्या प्रमाणात वापर केला जात असल्याचे आढळून येत आहे. पोलिस आयुक्तालयाच्या हद्दीत अमली पदार्थांची विक्री व सेवन रोखण्यासाठी पोलिस विभागाला सतर्क राहण्यासाठी व नियमित कारवाई करण्यासाठी सतत बैठका घेण्यात येतात. बंद पडलेल्या कंपन्या, गोदामे, कारखाने आदी ठिकाणी पथकांनी नियमित तपासणी करण्यासोबतच शेजारील राज्यातून अमली पदार्थ शहरात येणार नाहीत याकडे लक्ष देण्याच्या सूचनाही पोलिस आयुक्त मधुकर पांडे यांनी दिल्या असल्याची माहिती अमली पदार्थविरोधी कक्षाचे वरिष्ठ पोलिस निरीक्षक अमर मराठे यांनी दिली. अमली पदार्थांविरोधात पोलिसांकडून नियमितपणे जनजागृती मोहीम राबवली जाते. मात्र त्याचबरोबर पालकांनी देखील आपल्या मुलांवर लक्ष ठेवले तर अमली पदार्थांच्या विळख्यातून त्यांची सुटका होण्यास मदत होणार आहे, असे आवाहन पोलिसांकडून करण्यात आले आहे.
