सातारा : सातारा जिल्ह्यात ड्रग्ज माफियांनी आपली पाळेमुळे घट्ट रोवली असल्याचे पुन्हा एकदा समोर आले आहे. कराड तालुक्यातील पाचुपतेवाडी येथे पुण्याच्या अंमली पदार्थ विरोधी पथकाने (DRI) धाड टाकून ड्रग्ज बनवण्याचा एक मोठा कारखाना उद्ध्वस्त केला आहे. एका कोंबड्यांच्या शेडमध्ये हा काळा बाजार सुरू होता. या कारवाईत कोट्यवधी रुपयांचे ड्रग्ज आणि कच्चा माल जप्त केल्याची खळबळजनक माहिती समोर आली आहे. पाचुपतेवाडी येथील एका निर्जन स्थळी असलेल्या कोंबड्यांच्या शेडमध्ये जानेवारी महिन्यापासून एमडी ड्रग्ज तयार केले जात होते. याबाबतची गुप्त माहिती डीआरआयला मिळाली होती. या माहितीच्या आधारे डीआरआयने अत्यंत गुप्तपणे ही कारवाई केली. या कारवाईत पोलिसांनी रेकॉर्डवरील गुन्हेगार बाबा मोरे याच्यासह एकूण चार जणांना ताब्यात घेतलं आहे. या ठिकाणाहून अंदाजे ७ ते ८ कोटी रुपयांचा तयार माल आणि मोठ्या प्रमाणात ड्रग्ज बनवण्यासाठी लागणारे साहित्य जप्त करण्यात आले आहेत.
मिळालेल्या माहितीनुसार, जप्त केलेल्या कच्च्या मालातून जर एमडी ड्रग्ज तयार झाले असते, तर त्याची आंतरराष्ट्रीय बाजारपेठेतील किंमत हजारो कोटी रुपये इतकी असती. मात्र, डीआरआयच्या पथकाने वेळेत धाड टाकून हा मोठा कट उधळून लावला. या ठिकाणची यंत्रसामग्री आणि कच्चा माल बघून तपास पथकही चक्रावून गेलं. या कारवाईचे सर्वात मोठे वैशिष्ट्य म्हणजे इतकी मोठी धाड पडेपर्यंत सातारा आणि कराड पोलिसांना याची पुसटशी कल्पनाही नव्हती. हे पथक थेट गुजरात आणि हैदराबादवरून आलं असल्याचं समजते. एनडीपीएस कायद्यांतर्गत ही कारवाई करण्यात आली असून, तपासाची गोपनीयता राखण्यासाठी स्थानिक यंत्रणेला दूर ठेवण्यात आले असावे, अशी चर्चा सध्या सुरू आहे. सातारा जिल्ह्यात अमली पदार्थांविरोधी झालेली ही महिनाभरातील दुसरी मोठी कारवाई आहे. यापूर्वी डिसेंबरमध्ये मुंबई पोलिसांनी सावरी गावात छापेमारी करून ड्रग्ज जप्त केले होते. आता कराडमध्ये ड्रग्ज कारखाना उद्ध्वस्त केला आहे. या प्रकरणी अद्याप कोणतीही अधिकृत माहिती डीआरआय विभागाकडून प्रसिद्ध करण्यात आलेली नाही. या घटनेचा तपास सुरू आहे. यासंदर्भात कराडच्या डीवायएसपी राजश्री पाटील यांच्याशी संपर्क साधला असता त्या म्हणाल्या की, कारवाई बद्दल आम्हाला कसलीच कल्पना दिलेली नाही. त्यामुळे कारवाईत नेमकं काय सापडले हे आम्हाला माहीत नाही. तसेच, कराड ग्रामीणचे पोलीस निरीक्षक महेंद्र जगताप यांनी देखील कारवाईबद्दल माहिती नसल्याचे सांगितले. यामुळे एकूणच सातारा जिल्हा पोलीस दलाची नाचक्की झाली आहे.
