नवी मुंबई : समाज माध्यमावर गाडी चोरीचे चित्रण पाहून वाहन चोरी करणारा आणि त्याला साहाय्य करणारे तिघे या चौकडीला गुन्हे शाखेने जेरबंद केले आहे. त्यांना अटक केल्यावर केलेल्या चौकशीत त्यांनी २३ ठिकाणी वाहन चोरीची कबुली दिली असून हि वाहने जप्त करण्यात आली आहे. या आरोपींना न्यायालयात हजर केले असता त्यांना सहा फेब्रुवारी पर्यंत पोलीस कोठडी फर्माविण्यात आली आहे.
संतोष लक्ष्मण ढोले, वय ४५ वर्षे, लक्ष्मण तिपन्ना मासाळकर, वय ३४ वर्षे, संजीव गंगाराम सक्सेना, वय ५२ वर्षे आणि कैलास खेताजी चौधरी वय. ३८ वर्षे,असे अटक संशयीत आरोपींची नावे आहेत. यातील संतोष ढोले हा या टोळीचा सूत्रधार आहे.संतोषने गाडी चोरी करण्यासाठी समाज माध्यमाचा आधार घेतला. यात गाड्यांचे कुलूप कसे तोडायचे, किल्ली नसताना गाडी कशी सुरु करायची असे चित्रण पाहून त्याचे प्रात्यक्षिक त्याने अनेकदा केले. आपण आता गाड्या चोरी शकतो याचा विश्वास त्याला आल्यावर अन्य साथीदारांची जमवाजमव त्याने केली. गाड्यांची रेकी करणे विकणे गाडी जुनी खराब असेल तर त्याचे भाग विकणे हि कामे अन्य साथीदार करत होते. तसेच चोरी केलेल्या वाहनावर त्याचे नावे असलेल्या वाहनांच्या क्रमांक पाटी बदलणे बनावट कागदपत्रे बनवून ती विक्रीही केली जात असल्याचे तपासात निष्पन्न झाले. तपास पथकाने अटक आरोपींकडे केलेल्या कौशल्यपुर्ण व तांत्रिक तपासातुन मुंबई व उपनगर परिसरामधील १८ मोटारसायकल चोरीचे व ०५ रिक्षा चोरीचे एकुण २३ गुन्हे उघडकीस आणले आहेत.
