उल्हासनगर : अंबरनाथ, उल्हासनगर पालिकांतील सर्वच विभागांतील अधिकारी गेल्या महिनाभरापासून लोकसभा निवडणुकीच्या कामांमध्ये व्यस्त आहेत. यापैकी अतिक्रमण विभागाच्या कर्मचाऱ्यांवर विविध जबाबदाऱ्या सोपवल्या आहेत. नेमक्या याचाच फायदा घेत भूमाफीयांकडून अवैध बांधकामे जोरात सुरू झाली आहेत. शहर आणि ग्रामीण भागांत बेकायदा इमारतींचे मजल्यांवर मजले चढवले जात आहेत. मागील एक ते दीड महिन्यांपासून लोकसभा निवडणुकीची आचारसंहिता तसेच मतदान केंद्रे उभारणे, कायदा-सुव्यवस्था सांभाळण्यासाठी प्रशासनातील महापालिका, तहसील कार्यालय, पोलिस आदी सर्वच शासकीय विभागाचे कर्मचारी निवडणूक कामात गुंतलेले आहेत. त्यामुळे शासकीय कार्यालयांमधील दैनंदिन कामकाजांवरही त्याचा परिणाम होत आहे. तसेच या अधिकाऱ्यांच्या गैरहजेरीचा फायदा भूमाफीया आणि अनधिकृत बांधकाम करणाऱ्यांकडून घेतला जात आहे.
उल्हासनगरमधील अनेक भागांत बेकायदा अनधिकृत बांधकामे सुरू आहेत. हीच परिस्थिती अंबरनाथ शहरातील पूर्व आणि पश्चिम भागांतील काही परिसर तसेच तालुक्यातील ग्रामीण भागांतही दिसत आहे. प्रशासन निवडणुकीच्या कामांमध्ये व्यस्त असताना किमान स्थानिक लोकप्रतिनिधींनी अनधिकृत बांधकामांना अटकाव करण्याची अपेक्षा नागरिकांकडून व्यक्त केली जात आहे. मात्र स्थानिक लोकप्रतिनिधींकडूनही या अनधिकृत बांधकाम करणाऱ्यांना पाठीशी घातले जात आहे. त्यामुळे सर्वत्र अनधिकृत बांधकामे होत असल्याने शहराचे विद्रुपीकरण सुरू आहे. आचारसंहितेच्या काळात उभ्या राहिलेल्या अनधिकृत बांधकामांवर मतदानानंतर पालिकेच्या अतिक्रमण विभागाकडून कारवाई केली जाईल का, असा प्रश्न रहिवाशांकडून उपस्थित केला जात आहे. शहरातील विस्तारीत परिसर, कल्याण, बदलापूर राज्य महामार्ग, काटई-कर्जत या राज्य महामार्गांच्या कडेलाही रोज फेरीवाल्यांचे अतिक्रमण सुरू आहे. अनेक ठिकाणी फेरीवाले पत्रे आणि हिरव्या कापडांचे शेड लावून जागा बळकावत आहेत. मात्र एमआयडीसी आणि संबंधित विभाग याकडे दुर्लक्ष करत असल्याने राज्य महामार्गांच्या विद्रुपीकरणातही भर पडत आहे.
