मुंबई : महाराष्ट्र लोकसेवा आयोगाचे (एमपीएससी) सचिव महेंद्र हरपाळकर यांची अखेर बदली करण्यात आली असून, एमपीएससी परीक्षार्थी विद्यार्थ्यांच्या प्रमुख मागण्यांपैकी एक मागणी पूर्ण झाली आहे. मुख्यमंत्री देवेंद्र फडणवीस यांनी विद्यार्थी प्रतिनिधींशी झालेल्या चर्चेदरम्यान सचिवांची बदली करण्याचे आश्वासन दिले होते. त्यानुसार सामान्य प्रशासन विभागाने यासंदर्भातील शासन निर्णय जारी केला आहे. मुख्यमंत्री फडणवीस यांनी पुण्यात नियोजित २ ऑक्टोबर रोजीच्या एमपीएससी विद्यार्थ्यांच्या आंदोलनापूर्वी विद्यार्थ्यांच्या शिष्टमंडळाशी चर्चा केली होती. या बैठकीत विद्यार्थ्यांनी एमपीएससीच्या कामकाजातील विविध प्रश्न आणि मागण्या मांडल्या होत्या. विद्यार्थ्यांची प्रमुख मागणी आयोगाच्या अध्यक्षांच्या राजीनाम्याची होती. मात्र, अध्यक्षांचा राजीनामा घेणे शक्य नसल्याचे स्पष्ट करत मुख्यमंत्र्यांनी सचिव महेंद्र हरपाळकर यांची बदली करण्यात येईल, असे आश्वासन दिले होते. त्यानुसार आता हरपाळकर यांची प्रतिनियुक्ती संपुष्टात आणण्याचा निर्णय घेण्यात आला आहे. विद्यार्थ्यांच्या आंदोलनानंतर सरकारने तातडीने कारवाई केल्याने परीक्षार्थ्यांमध्ये समाधानाचे वातावरण निर्माण झाले आहे.
महेंद्र उत्तमराव हरपाळकर यांची महाराष्ट्र लोकसेवा आयोगाच्या सचिवपदी दोन वर्षांच्या प्रतिनियुक्तीवर नियुक्ती करण्यात आली होती. मात्र, आता प्रशासकीय कारणास्तव त्यांच्या सचिवपदावरील प्रतिनियुक्ती संपुष्टात आणण्यात आली असून, त्यांच्या पुढील पदस्थापनेचे आदेश स्वतंत्रपणे जारी करण्यात येणार आहेत. शासनाच्या आदेशानुसार, महेंद्र हरपाळकर यांनी महाराष्ट्र लोकसेवा आयोगाच्या अध्यक्षांच्या संमतीने आपल्या पदाचा कार्यभार तत्काळ अन्य अधिकाऱ्याकडे सोपविण्याचे निर्देश देण्यात आले आहेत. ३० सप्टेंबर रोजी मुख्यमंत्री देवेंद्र फडणवीस यांनी एमपीएससी विद्यार्थी प्रतिनिधींसोबत झालेल्या बैठकीत विद्यार्थ्यांचे प्रश्न अत्यंत संवेदनशीलतेने ऐकून घेतले होते. व्यवस्थेवरील विद्यार्थ्यांचा विश्वास पुन्हा दृढ करण्यासाठी संविधान आणि कायद्याच्या चौकटीत राहून शक्य ते सर्व निर्णय घेण्याचे आश्वासन त्यांनी दिले होते. मुख्यमंत्री फडणवीस यांनी दिलेला शब्द पाळत सचिवांची बदली करण्यात आल्याची प्रतिक्रिया आमदार विक्रम पाचपुते यांनी व्यक्त केली. या निर्णयामुळे एमपीएससीच्या कामकाजात अधिक पारदर्शकता आणि विद्यार्थ्यांचा विश्वास वाढेल, अशी अपेक्षा विद्यार्थी प्रतिनिधींनी व्यक्त केली आहे.
