मुंबई : सलमान खानचा लोकप्रिय रिअॅलिटी शो ‘बिग बॉस २०’ सुरू झाल्यापासूनच घरातील वातावरण चांगलेच तापले आहे. घरात प्रवेश केल्यापासून स्पर्धकांमध्ये वाद, मतभेद आणि आरोप-प्रत्यारोपांचे सत्र सुरू आहे. नुकत्याच पार पडलेल्या ‘वीकेंड का वार’मध्ये सलमान खानने स्काऊट, आसिफ खान यांच्यासह काही स्पर्धकांना त्यांच्या वागणुकीवरून सुनावले होते. त्यानंतर आता नव्या आठवड्यातील नॉमिनेशन टास्कमुळे घरातील स्पर्धा आणखी रंगतदार झाली आहे. गेल्या आठवड्यात ईशा रिखी ‘बिग बॉस २०’च्या घरातून बाहेर पडली होती. आता शोच्या चौथ्या आठवड्याला सुरुवात झाली असून नॉमिनेशन प्रक्रिया पार पडली आहे. यावेळी तब्बल ११ स्पर्धक नॉमिनेट झाले आहेत.
२८ सप्टेंबर रोजी प्रसारित झालेल्या भागात बिग बॉसने या आठवड्याच्या नॉमिनेशन टास्कची घोषणा केली. या टास्कमध्ये स्पर्धकांना जोड्यांमध्ये विभागण्यात आले होते. प्रत्येक जोडीला आपापसात चर्चा करून कोणाला सुरक्षित ठेवायचे आणि कोणाला नॉमिनेट करायचे, याचा निर्णय घ्यायचा होता. मात्र, जर दोन्ही स्पर्धकांमध्ये एकमत झाले नाही, तर दोघांनाही थेट नॉमिनेशनला सामोरे जावे लागणार होते. या नियमामुळे अनेक जोड्यांमध्ये मतभेद झाले आणि अखेर अनेक स्पर्धक नॉमिनेशनच्या फेऱ्यात अडकले. नॉमिनेशन प्रक्रियेत रिती तिवारी आणि आम्रपाली दुबे यांच्यात निर्णयावर एकमत होऊ शकले नाही, त्यामुळे दोघींनाही नॉमिनेट करण्यात आले. माही विज आणि अरिश्फा खान यांच्या जोडीमध्ये माहीने स्वतःला नॉमिनेट करून अरिश्फाला सुरक्षित केले. त्याचप्रमाणे स्काऊट ओपीने स्वतःला नॉमिनेट करत आसिफ खानला सुरक्षित केले. काजी तौकीर आणि उदिती सिंह, तसेच अमन गांधी आणि कनिका मान यांच्यातही एकमत न झाल्याने दोन्ही जोड्या नॉमिनेट झाल्या. यानंतर युंग डीएसए, लव्ह गिल आणि मेरी कॉम या स्पर्धकांमध्येही निर्णय होऊ शकला नाही. त्यामुळे तिघांनाही नॉमिनेशनचा सामना करावा लागणार आहे. या आठवड्यात नॉमिनेट झालेल्या स्पर्धकांमध्ये माही विज, काजी तौकीर, उदिती सिंह, अमन गांधी, कनिका मान, युंग डीएसए, लव्ह गिल, मेरी कॉम, रिती तिवारी, आम्रपाली दुबे आणि स्काऊट ओपी यांचा समावेश आहे. दरम्यान, कॅप्टन गुल्लू, अरिश्फा खान आणि आसिफ खान हे तीन स्पर्धक या आठवड्याच्या नॉमिनेशनपासून सुरक्षित आहेत. त्यामुळे घरातील १४ पैकी तब्बल ११ स्पर्धक आता धोक्यात आले आहेत. आता प्रेक्षकांच्या मतांवर कोणाचा प्रवास पुढे सुरू राहतो आणि कोणाला ‘बिग बॉस 20’च्या घरातून बाहेर पडावे लागते, याकडे सर्वांचे लक्ष लागले आहे.
