रत्नागिरी : रत्नागिरी जिल्हा आता गोव्याप्रमाणेच पर्यटकांना आकर्षित करत असून, जिल्ह्याच्या पर्यटन विकासासाठी शासनाकडून विविध उपाययोजना करण्यात येत आहेत. हॉटेल आणि फळप्रक्रिया व्यवसायांना उद्योगांचा दर्जा देण्याचा शासनाचा विचार असून, त्यातून या क्षेत्रात मोठे बदल घडतील, असे प्रतिपादन पालकमंत्री उदय सामंत यांनी केले. पुढील दोन वर्षांत पर्यटकांना जिल्ह्यातील विविध ठिकाणांची माहिती देण्यासाठी पर्यटन विकास केंद्र उभारण्यात येणार असल्याची माहिती त्यांनी दिली. जागतिक पर्यटन दिनानिमित्त रत्नागिरी पर्यटन सहकारी सेवा संस्था मर्यादित, समृद्ध मराठी चेंबर्स ऑफ कॉमर्स आणि पर्यटन संचालनालय यांच्या संयुक्त विद्यमाने आयोजित कार्यक्रमात ते बोलत होते. यावेळी आमदार ज्ञानेश्वर म्हात्रे, नगराध्यक्ष शिल्पा सुर्वे, इन्फिगो आय केअरचे व्यवस्थापकीय संचालक डॉ. श्रीधर ठाकूर यांच्यासह अनेक मान्यवर उपस्थित होते.
मंत्री उदय सामंत यांनी सांगितले की, रत्नागिरीत दिवाळी, ३१ डिसेंबर, शिमगा आणि गणेशोत्सवासारख्या सणांच्या काळात हॉटेल व्यवसायाला मोठा प्रतिसाद मिळत असून, या काळात ९० ते ९५ टक्के हॉटेल्स पूर्ण क्षमतेने भरलेली असतात. त्यामुळे पर्यटन क्षेत्राच्या विस्तारासाठी पायाभूत सुविधा मजबूत करणे गरजेचे आहे. रत्नागिरी विमानतळाच्या विकासासाठी सुमारे १०० कोटी रुपये खर्च करून धावपट्टीची लांबी १४०० मीटरवरून २१०० मीटर आणि रुंदी ३० मीटरवरून ४५ मीटर करण्यात आली आहे. त्यामुळे येथे ८२ आसनी एटीआर विमान सहज उतरू शकणार आहे. तसेच उडाण योजनेअंतर्गत देशातील इतर ठिकाणांच्या तुलनेत सुसज्ज टर्मिनल इमारत रत्नागिरीत उभारण्यात आली असून, येथे छत्रपती शिवाजी महाराज आणि कोकणी संस्कृतीचे दर्शन घडते. रत्नागिरी विमानतळाच्या टर्मिनलमध्ये कोकणातील स्थानिक उत्पादनांना जागतिक बाजारपेठ मिळावी यासाठी सहा विशेष स्टॉल्स उभारण्यात आले आहेत. या माध्यमातून पर्यटकांना कोकम सरबत, सोलकढी यांसह विविध कोकणी पदार्थांची ओळख होणार आहे. तसेच आगामी जानेवारीच्या पहिल्या आठवड्यात रत्नागिरी विमानतळावरून मुंबई आणि हैदराबादसाठी विमानसेवा सुरू करण्याची घोषणा मंत्री सामंत यांनी केली. विमानसेवा सुरू झाल्यानंतर रत्नागिरीच्या पर्यटनाला आणखी मोठी चालना मिळण्याची अपेक्षा व्यक्त करण्यात येत आहे.
