मुंबई : सार्वजनिक गणेशोत्सवाची समृद्ध परंपरा, त्यामागील सामाजिक ऐक्य, सांस्कृतिक वारसा आणि गणेशभक्तीचे विविध पैलू जगभर पोहोचविण्याच्या उद्देशाने राज्य सरकारने ‘Bappa.org’ या डिजिटल मंचाची सुरुवात केली आहे. मुंबईतील एशियाटिक सोसायटी येथे झालेल्या कार्यक्रमात मुख्यमंत्री देवेंद्र फडणवीस यांनी आपल्या घरातील गणेशोत्सवाची माहिती या पोर्टलवर अपलोड करून या उपक्रमाचा शुभारंभ केला. याच वेळी ‘बाप्पा रथ’ या राज्याच्या सांस्कृतिक चित्ररथालाही हिरवा झेंडा दाखवण्यात आला. सर जे. जे. स्कूल ऑफ आर्टच्या विद्यार्थी आणि शिल्पकारांनी साकारलेला १२ फूट उंचीचा आकर्षक मोदक हा या चित्ररथाचा मुख्य आकर्षण ठरला. मुख्यमंत्री फडणवीस यांनी सांगितले की, या डिजिटल मंचाच्या माध्यमातून महाराष्ट्रातील सुमारे ४० हजार गावांमधील गणेशमूर्ती, गणेशोत्सवाच्या परंपरा, स्थानिक श्रद्धा आणि त्यांच्याशी संबंधित वैशिष्ट्यपूर्ण कथा एका व्यासपीठावर आणल्या जाणार आहेत. भारतासह परदेशातील गणेशभक्तांचे अनुभव, विविध देशांतील गणेश उपासनेच्या परंपरा आणि काळानुसार बदलत गेलेले गणेशोत्सवाचे स्वरूपही या मंचावर उपलब्ध होणार आहे. गणेशोत्सवाला जागतिक स्तरावर अधिक व्यापक ओळख मिळावी आणि भविष्यात या परंपरेला जागतिक वारशाचा दर्जा मिळावा, हा या उपक्रमामागील प्रमुख उद्देश असल्याचे त्यांनी स्पष्ट केले. जपानसह आशियातील अनेक देशांमध्ये श्री गणेशाची उपासना केली जाते, त्यामुळे भारतीय संस्कृतीतील या महत्त्वपूर्ण परंपरेची जागतिक पातळीवर मांडणी करण्यासाठी हा डिजिटल उपक्रम महत्त्वाचा ठरणार असल्याचेही त्यांनी नमूद केले.
या उपक्रमाचा भाग म्हणून ‘मोदक’ या प्रतीकात्मक संकल्पनेलाही राज्यभर आणि विविध ठिकाणी नेण्यात येणार असून, त्याच्या प्रवासातून गणेशोत्सवाशी संबंधित कथा, लोकपरंपरा आणि सांस्कृतिक वारसा लोकांपर्यंत पोहोचवला जाणार आहे. कार्यक्रमात सांस्कृतिक कार्य मंत्री ॲड. आशिष शेलार यांनी सांगितले की, Bappa.org हे व्यासपीठ घरगुती तसेच सार्वजनिक गणेशोत्सवांशी जोडलेल्या ‘गणेशकथा’ संकलित करून त्या जगभरातील भाविकांपर्यंत पोहोचवेल. प्रत्येक गणेशोत्सवाची स्वतंत्र परंपरा, श्रद्धा आणि सांस्कृतिक वैशिष्ट्ये डिजिटल स्वरूपात जतन करून महाराष्ट्राच्या या समृद्ध वारशाकडे युनेस्कोसह आंतरराष्ट्रीय संस्थांचे लक्ष वेधण्याचा प्रयत्न केला जाणार आहे. पंतप्रधान नरेंद्र मोदी यांनी मांडलेल्या ‘वारसा आणि विकास’ या संकल्पनेशी सुसंगत असा हा उपक्रम असल्याचेही त्यांनी नमूद केले. कार्यक्रमादरम्यान श्रीपाद आष्टेकर यांनी मुख्यमंत्री सहायता निधीसाठी ५१ लाख रुपयांचा धनादेश मुख्यमंत्री देवेंद्र फडणवीस यांच्याकडे सुपूर्द केला. तसेच सांस्कृतिक कार्य विभाग आणि eFlag Corp Pvt. Ltd. यांच्यात मुख्यमंत्री यांच्या उपस्थितीत सामंजस्य करारावर स्वाक्षऱ्या करण्यात आल्या. या कार्यक्रमाला सांस्कृतिक कार्य विभागाचे सचिव किरण कुलकर्णी, eFlag Corp Pvt. Ltd. चे संस्थापक व व्यवस्थापकीय संचालक श्रीपाद आष्टेकर तसेच अनेक मान्यवर आणि मुंबईकर नागरिक उपस्थित होते. ‘Bappa.org’ या डिजिटल मंचामुळे महाराष्ट्रातील गणेशोत्सवाच्या परंपरा, श्रद्धा आणि सांस्कृतिक वैभव एका जागतिक डिजिटल व्यासपीठावर पोहोचण्याचा नवा अध्याय सुरू झाला आहे.
