मुंबई : शिवसेना पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे यांच्या नेतृत्वाखाली ४ ऑक्टोबर रोजी मुंबईत निवडणूक आयोगाच्या कार्यपद्धतीविरोधात भव्य मोर्चाचे आयोजन करण्यात आले आहे. मनसेप्रमुख राज ठाकरे यांनी या मोर्चाची अधिकृत घोषणा करत हा कोणत्याही एका राजकीय पक्षाचा कार्यक्रम नसून लोकशाहीच्या संरक्षणासाठी नागरिकांनी काढलेला मोर्चा असल्याचे स्पष्ट केले. निवडणूक आयोगाच्या निर्णयांबाबत निर्माण झालेल्या प्रश्नांच्या पार्श्वभूमीवर हा मोर्चा आयोजित करण्यात येत असून, सर्वच राजकीय पक्षांनी या आंदोलनात सहभागी व्हावे, असे आवाहनही त्यांनी केले. विशेष म्हणजे, विरोधकांसोबतच सत्ताधारी पक्षातील लोकांनीही या मोर्चात सहभागी व्हावे, असे राज ठाकरे यांनी नमूद केले. निवडणूक आयोगाचे प्रमुख ज्ञानेश कुमार यांच्या कार्यपद्धतीवर प्रश्न उपस्थित करत ठाकरे बंधूंनी हा एल्गार पुकारला आहे. त्यामुळे या मोर्चाकडे राज्याच्या राजकीय वर्तुळाचे विशेष लक्ष लागले आहे.
राज ठाकरे यांनी दिलेल्या माहितीनुसार, ४ ऑक्टोबर रोजी सकाळी ११ वाजता भायखळा येथील रिचर्डसन अँड क्रुडास कंपनीसमोरून मोर्चाला सुरुवात होईल. त्यानंतर हा मोर्चा मुंबई महानगरपालिका मुख्यालयापर्यंत जाईल आणि शेवटी त्याचे सभेत रूपांतर होणार आहे. या आंदोलनाचे वैशिष्ट्य म्हणजे मोर्चामध्ये कोणत्याही राजकीय पक्षाचा झेंडा वापरला जाणार नाही. सहभागी नागरिकांच्या हातात केवळ राष्ट्रीय तिरंगा असेल. “ही लढाई कोणत्याही पक्षासाठी नसून लोकशाही वाचविण्यासाठी आहे,” असे राज ठाकरे यांनी स्पष्ट करत आंदोलनाला व्यापक लोकसमर्थन मिळावे, असे आवाहन केले. निवडणूक आयोगाच्या कार्यपद्धतीबाबत उपस्थित करण्यात आलेल्या प्रश्नांमुळे हा मोर्चा राज्याच्या राजकीय घडामोडींमध्ये महत्त्वाचा ठरण्याची शक्यता व्यक्त केली जात आहे. ४ ऑक्टोबर रोजी होणाऱ्या या आंदोलनात विविध राजकीय पक्ष, सामाजिक संघटना आणि नागरिकांचा किती प्रतिसाद मिळतो, याकडे आता सर्वांचे लक्ष लागले आहे.
