पुणे : महाराष्ट्रात पुन्हा एकदा निवडणुकीचे वातावरण तापू लागले असून निवडणूक आयोगाने विधानपरिषदेच्या पदवीधर आणि शिक्षक मतदारसंघातील पाच जागांसाठी निवडणूक कार्यक्रम जाहीर केला आहे. या निवडणुकीत औरंगाबाद, पुणे आणि नागपूर विभागातील पदवीधर मतदारसंघ तसेच अमरावती आणि पुणे विभागातील शिक्षक मतदारसंघांचा समावेश आहे. जाहीर करण्यात आलेल्या कार्यक्रमानुसार २९ सप्टेंबर रोजी निवडणुकीची अधिसूचना प्रसिद्ध होणार असून उमेदवारी अर्ज दाखल करण्याची अंतिम मुदत ६ ऑक्टोबर निश्चित करण्यात आली आहे. अर्जांची छाननी आणि माघारीची प्रक्रिया पूर्ण झाल्यानंतर २३ ऑक्टोबर रोजी मतदान होईल, तर २७ ऑक्टोबर रोजी मतमोजणी करून निकाल जाहीर केला जाणार आहे. निवडणूक कार्यक्रम जाहीर होताच संबंधित मतदारसंघांमध्ये राजकीय हालचालींना वेग आला असून विविध पक्षांतील इच्छुक उमेदवारांनी मोर्चेबांधणी सुरू केली आहे. विशेषतः पुणे विभागातील पदवीधर आणि शिक्षक मतदारसंघांकडे सर्वांचे लक्ष लागले आहे. महायुतीतील जागावाटपाबाबत अद्याप अंतिम निर्णय न झाल्याने उमेदवारीवरून पडद्यामागील घडामोडी वाढल्या आहेत. दरम्यान, उपमुख्यमंत्री एकनाथ शिंदे यांचे विशेष कार्यकारी अधिकारी (ओएसडी) मंगेश चिवटे तसेच उद्योगमंत्री उदय सामंत यांचे ओएसडी आणि वाडिया महाविद्यालयाचे संचालक प्रा. डॉ. सचिन सानप यांनी एकाच दिवशी राष्ट्रवादी काँग्रेसचे अध्यक्ष शरद पवार आणि खासदार सुप्रिया सुळे यांची घेतलेली भेट राजकीय वर्तुळात चर्चेचा विषय ठरली आहे. या भेटींमुळे पुणे शिक्षक मतदारसंघातील संभाव्य उमेदवारी आणि भविष्यातील राजकीय समीकरणांबाबत विविध तर्कवितर्कांना उधाण आले आहे.
पुणे विभागातील पदवीधर आणि शिक्षक मतदारसंघांसाठी मतदारयादीची प्रक्रिया पूर्ण झाली असून प्रशासकीय स्तरावर निवडणुकीची तयारी सुरू आहे. चिवटे यांनी सुप्रिया सुळे यांची, तर डॉ. सचिन सानप यांनी शरद पवार यांची भेट घेतल्यामुळे या हालचालींना अधिक महत्त्व प्राप्त झाले आहे. या भेटींचा नेमका उद्देश अधिकृतरीत्या स्पष्ट करण्यात आलेला नसला, तरी शिक्षक मतदारसंघातील उमेदवारी आणि संभाव्य पाठिंब्याबाबत चर्चा रंगू लागली आहे. दुसरीकडे पुणे पदवीधर मतदारसंघातही महायुतीतील जागावाटपाचा पेच कायम आहे. भारतीय जनता पक्षाकडून शरद लाड, तर राष्ट्रवादी काँग्रेसकडून प्रताप ऊर्फ भय्या माने यांच्या नावाची जोरदार चर्चा सुरू आहे. राष्ट्रवादी काँग्रेसचे ज्येष्ठ नेते आणि मंत्री हसन मुश्रीफ यांनी माने यांच्या उमेदवारीला पाठिंबा दर्शविल्याची चर्चा असली, तरी महायुतीकडून अद्याप अधिकृत उमेदवार जाहीर करण्यात आलेला नाही. त्यामुळे या जागेवर अंतिम उमेदवारी कोणाला मिळणार, याबाबत उत्सुकता वाढली आहे. पुणे शिक्षक मतदारसंघात रयत शिक्षण संस्थेसह अनेक मोठ्या शैक्षणिक संस्थांचा प्रभाव असल्याने या निवडणुकीत त्यांची भूमिका निर्णायक ठरू शकते, असे राजकीय निरीक्षकांचे मत आहे. रयत शिक्षण संस्थेशी शरद पवार यांचे दीर्घकाळचे संबंध असल्यामुळे पवार कुटुंबाची भूमिका आणि संभाव्य पाठिंबा याकडे इच्छुक उमेदवारांचे लक्ष लागले आहे. मागील निवडणुकीत रयत शिक्षण संस्था, भारती विद्यापीठ आणि इतर शैक्षणिक संस्थांचा पाठिंबा महत्त्वाचा ठरल्याची चर्चा होती. त्या निवडणुकीत जयंत आसगावकर विजयी झाले होते. यंदाही त्यांनी निवडणुकीसाठी तयारी सुरू केली असून त्यांच्या राजकीय समीकरणांमध्ये आमदार सतेज पाटील यांची भूमिका महत्त्वाची मानली जात आहे. त्यामुळे पुणे विभागातील पदवीधर आणि शिक्षक मतदारसंघातील निवडणूक यंदा चुरशीची होण्याची चिन्हे दिसत आहेत.
