ठाणे : दहीहंडी उत्सव अवघ्या काही दिवसांवर येऊन ठेपला असून ठाण्यातील बाजारपेठांमध्ये उत्सवी खरेदीला वेग आला आहे. दहीकाला भरण्यासाठी लागणारी मडकी, गोविंदांसाठी डोक्यावर बांधण्याच्या रंगीबेरंगी पट्ट्या, हंडी सजावटीचे साहित्य आणि विविध पूजासामग्रीच्या दुकानांमध्ये ग्राहकांची मोठी गर्दी दिसत आहे. मात्र यंदा महागाईचा फटका दहीहंडीच्या पारंपरिक मडक्यांनाही बसला असून त्यांच्या किमतीत सुमारे ५० रुपयांनी वाढ झाली आहे.
कृष्ण जन्माष्टमी आणि दहीहंडी उत्सवाच्या पार्श्वभूमीवर गोविंदा पथकांकडून तयारी अंतिम टप्प्यात पोहोचली आहे. ठाणे शहरात मोठ्या प्रमाणावर दहीहंडी उत्सव साजरा केला जात असल्याने मडक्यांची मागणीही लक्षणीय वाढली आहे. बाजारात उपलब्ध असलेली बहुतांश मडकी सुरत येथून आणली जातात. ही मडकी माती आणि राखेपासून तयार केली जात असून पावसाळ्यात ती वाळत नसल्यामुळे त्यांचे उत्पादन एप्रिल-मे महिन्यापासून सुरू केले जाते. साध्या मडक्यांपेक्षा आकर्षक दिसावीत म्हणून त्यावर फॅब्रिक रंग, रंगीत दगड आणि विविध सजावटीच्या वस्तूंचा वापर केला जातो. काही विक्रेते तयार मडकी खरेदी करून त्यांना सजावट करतात, तर काही स्वतः मडकी तयार करून त्यावर कलात्मक नक्षीकाम करतात. बाजारात लहान मडक्यांची किंमत १०० रुपयांपासून सुरू होत असून आकार, नक्षीकाम आणि सजावटीनुसार त्यांची किंमत वाढत जाते. यंदा मात्र रंग, थिनर आणि सजावटीच्या साहित्याच्या दरात मोठी वाढ झाल्याने मडक्यांच्या किमती वाढल्या आहेत. विक्रेत्यांच्या माहितीनुसार, ९०० रुपयांना मिळणारा रंग आता १,३०० रुपयांपर्यंत पोहोचला आहे. तसेच ६०० रुपयांचा पाच लिटरचा थिनरचा डबा आता ९०० रुपयांना मिळत असल्याने उत्पादन खर्चात मोठी वाढ झाली आहे. याशिवाय सजावटीसाठी वापरल्या जाणाऱ्या रंगीत खडे आणि इतर साहित्यही महाग झाले आहे. मडकी विक्रेते वाशीम देवर्जी यांनी सांगितले की, पेट्रोलच्या दरवाढीचा परिणाम रंग आणि इतर साहित्याच्या उत्पादन खर्चावर झाला असून त्यामुळे मडक्यांच्या किमती वाढवणे अपरिहार्य ठरले आहे. तरीही दहीहंडी उत्सवाचा उत्साह कायम असून ग्राहकांकडून आकर्षक आणि पारंपरिक मडक्यांना मोठी पसंती मिळत असल्याचे त्यांनी सांगितले. महागाई असूनही उत्सवाच्या पार्श्वभूमीवर बाजारपेठांमध्ये उत्साहाचे वातावरण आहे. गोविंदा पथके, मंडळे आणि नागरिक मोठ्या उत्साहाने खरेदी करत असून दहीहंडीच्या जल्लोषासाठी आवश्यक साहित्याची विक्री वेगाने सुरू आहे. यंदाही पारंपरिक मडक्यांना मोठी मागणी असल्याने विक्रेत्यांना चांगल्या व्यवसायाची अपेक्षा आहे.
